Kven fortener å bli Årets namn?

Tradisjonen tru inviterer Grenda alle til å vera med og kåra Årets namn i Kvinnherad.

Grenda gjentek suksessen, og bed for 12. gong lesarane kåra «Årets namn i Kvinnherad». No bed vi om forslag på kandidatar til finaleheatet.

Sidan 2010 har Grenda sine lesarar stemt fram vinnaren av heidersteiknet «Årets namn i Kvinnherad». Fyrste året sigra den unge friidrettsutøvaren Frida Berge frå Ølve, medan det i fjor var brødreparet Kjetil og Vidar Mehl som gjekk til topps.

Kven som vinn i år, er det du som avgjer. Men før vi startar med røystinga, vil vi fyrst ha på kandidatar. Du må imidlertid vera rask, for torsdag 9. desember vert finaleheatet presentert og røystinga startar.

Fristen for forslag vert difor sett til måndag 6. desember.

– Kåringa av «Årets namn» har vore ein stor suksess i alle år. Vi vonar og reknar med at engasjementet rundt kåringa vert enormt også i år. Når årets siste utgåve av Grenda kjem i postkassa, er det mange som ventar spent på å sjå kven som prydar framsida. For oss er det dessutan kjekt å gjera stas på nokon som verkeleg har merka seg ut i året som har gått, og som såleis fortener ein ekstra heider, seier redaktør Håvard Sætrevik.

Forslag kan du senda inn per telefon til 53487100/90785457, e-post til post@grenda.no og i sosiale kanalar som Facebook og Instagram.

Vi kan sjølvsagt også ta i mot forslag til munnleg.