«Kvifor vel vi å klage på vedtak når vi er positive til utvikling på Børnes Industriområde?»

Vi etablerte oss på Børnes Industriområde i 1983 med vår fiskeforedlingsverksemd. Dette har fram til dei siste åra vore ein god plass å drifta frå, sjølv om det er utfordrande med logistikk av varer inn og ut av kommunen.

Kvinnherad kommune er i utvikling på same måte som resten av samfunnet. Vi håpar at Eidsvik Eigedom saman med kommunen vil få etablert fleire arbeidsplassar på Børnes Industriområde og at Kvinnherad kommune framleis vil vera ein god kommune å bu og driva næring i!

Administrasjonen i Kvinnherad kommune er i sluttfasen med arbeidet med å få på plass ein ny reguleringsplan med føresegner for området som er framtidsretta, og som vil gje føringar for kva næring som kan etablera seg her og kva moglegheiter og avgrensingar som skal gjelda.

I dei siste åra har kommunen selt tomter til ulike aktørar på Børnes Industriområde. Desse er planerte ut, og er ferdige til å setje opp bygg på, nokre få bygg er komne opp. I tillegg til dette så har det føregått ein del arbeid med steinknusing som det ikkje er søkt om, og som er langt utover det å tilretteleggje og planere tomteareal. Det er pr. i dag oss kjent ingen løyve på Børnes som går på å behandle og vidarebehandla stein og jord på industriområdet.

Med bakgrunn i dette så ser vi fram til ein ny reguleringsplan som tar hand om kva næringar som kan vera på industriområdet. I planutkastet så er det lagt inn: Det er avsett 12 areal til næringsbygningar. Områda kan nyttast til industri, handverks-, service- og lagerverksemd.

Næringsområdet ligg også tett opp til bustadområde og fritidseigedomar som må skånast frå nokre typar næringar, slik at dei kan trivast og ha eit godt bumiljø i nærleiken av industriarbeidsplassar.

Eidsvik Eigedom har skrive i sin søknad til Kommunen at det hastar å kome i gang med å planere ut areal. Kvifor skriv dei ingenting om. Kva er det som hastar slik? Kommunen har råda Eidsvik Eigedom til å vente med dette til ny reguleringsplan er godkjent og at det ligg føringar for området når det gjeld blant anna infrastruktur, kotehøgder, høgder på bygningar samt tidsplanar for dette arbeidet m.m. Dette støttar vi kommunen i.

For å kome Eidsvik Eigedom i møte, sidan ting hastar slik, så innstilte kommunedirektøren at dei kunne få sprenge ut og føre massar ut av området i håp om at reguleringsplanen snart blir godkjent. I Forvaltningsutvalet 16. desember 2020 så gjorde politikarene endring i forslag til vedtak frå Kommunedirektøren. Dei meinte at ein òg kan knuse stein på området, noko som medfører ei heilt anna belastning både når det gjeld støy, støv og transport inn og ut av området. Det er dette vi har klaga på! Slik vi ser det, burde heller endring i vedtak vore å utsetje behandlinga av denne søknaden til ny reguleringsplan er godkjent. Grunnen til dette er, at denne søknaden kun er ein del av det som er/vil verta omsøkt om for å tilretteleggje området. Det er også snakk om totalt over 100.000 kubikk med overskotsmassar som skal ut av området!

Vi håpar at vår og naboane sin klage blir tatt til følgje og at dette vedtaket var ein «glipp» der politikarane ikkje har sett seg godt nok inn i heilskapen i denne saka det gjeld.

Vi oppmodar våre politikarar til å setje seg godt inn i saker som dei skal behandla, slik at vi får gode vedtak som vi i kommunen kan leve med framover.

Vi håpar og at arbeidet med reguleringsplanen no snart er ferdigstilt og blir politisk vedtatt. Administrasjonen har jobba mykje med planen, og det har kome mange innspel og merknadar.

Vi håpar sjølvsagt at ordlyden i planen er av ein art slik at vi framleis kan driva vår verksemd frå Børnes Industriområde!

Om våre folkevalde har spørsmål rundt planen og spørsmål til våre merknadar/klage, så set vi pris på å bli kontakta.

 

Marit Hjønnevåg, Dagleg leiar Brødrene Hjønnevåg AS.