Kvinnherad Breiband er utsett for sabotasje. Estimert rettetid: ukjent

Tysdag morgon melder Kvinnherad Breiband om ein større feil i stamfibernettet.

I meldinga som er sendt ut til kundane skriv dei at det blir oppdatert informasjon på nettsida deira etter kvart.

– Vi har diverre ikkje kapasitet til å svare alle som tar kontakt via vårt kundesenter. Vi oppdaterer informasjon under driftsmeldingar på kband.no, opplyser dei i meldinga.

Jobbar på spreng

På telefon kan Gunnhild Hillestad fortelja at saka er politimeldt og at dei jobbar på spreng med å skaffe oversikt over situasjonen.

– No har vi kalla ut alt av mannskap. Det er stamfiberen som er råka, og fleire lokasjonar har fått skade samstundes. Dette har vi aldri opplevd før, og vi ser på det som svært alvorleg, seier ho.

Sidan det er så omfattande og dei enno ikkje har oversikt, kan dei heller ikkje gå ut med noko rettetid, noko dei har forståing for at er frustrerande for kundane som er ute.

Stamfiber er den viktigaste fibertypen Kvinnherad Breiband har. Fiberlinja går gjennom heile Kvinnherad og forsyner kundar med tenester som nett og tv.