Kvinnherad Husflidslag har ei klår oppmoding: Leik!

Kvinnherad Husflidslag har endeleg fått opp att kursaktiviteten sin. I helga var fire kreative damer samla i rohuset på Husnes, kor dei mellom anna jobba med ulike teknikkar innan trykk og måling.

Oppmodinga til deltakarane var enkel; Leik!

— Kurset heitte trykk, mal og sy, men det vart visst mest trykk og mal. Det er først den siste timen no at dei har sett seg med symaskinene, fortalte kurshaldaren Bente Rusten då Grenda svinga innom.

Blant aktivitetane var det dei kalla økotrykk, og sidan kurset snart var over, var det på tide å rulle ut openberringane frå dette arbeidet. Deltakarane hadde nytta lauv, gras, bær, spikrar og skruer til å dekorere kvite tekstilar. Plantefangsten hadde dei rulla inn til tekstilpølser, surra hyssing rundt, og bløytlagt i eddikk og rustvatn frå august. Resultatet minna om batikk i teknikk, men med ein svært organisk sving over det heile.

— Dette var gøy, Bente! braut Wenche Seljestad ut medan økotrykka vart rulla ut.

Dei andre deltakarane, Elna Marie Fludal og Wenche Tysse Sjo var også begeistra for både kurset og for det som var blitt produsert i løpet av dei to dagane det sto på. Forutan økotrykk, fekk dei freiste seg på mange forskjellige teknikkar, som til dømes kveitemjølstrykk, og dei laga eigne sjablongar med limpistol, med meir.

— Me har berre leikt oss, og hatt det veldig kjekt! smilte Elna Marie medan arbeidsbordet vart dekorert av alle slags tekstilar med varierte mønster i alle fargar.

— Og så har me hatt ein svært inspirerande lærar, la Wenche Tysse Sjo til.

Inviterer til sykurs for alle

Dei dekorerte tekstilane skal mogleg få nytt liv som puter, vesker eller anna fint. Kanskje dei kjem på veggen som tekstilbilete også.

Og mogleg finn tekstilane si framtidige form over nyttår, for 22. og 23. januar inviterer nemleg Kvinnherad Husflidslag til sytreff på Triohuset.

— Det blir ope for alle og det er same kva ein syr, om det er klede, puter eller kva det skulle vera. Ein kan berre byrje å melde seg på allereie no, helsa Bente, som også er kontaktperson dersom ein ynskjer å melde seg på.