Kvinnherad Vekstbedrift skiftar styreleiar

Generalforsamlinga i Kvinnherad Vekstbedrift 28. juni enda i at alle kommunen sine representantar i styret vart bytta ut.

Signe Torill Skogseth er ny leiar for styret, og får med seg Gaute Lund, Gunhild Marie Kvåle og Kristine Såtendal (tilsetterepresentant) som faste medlemmer. Vararepresentantar er Anton Langeland, Marit Jensen Måkestad, Finn Guddal (tilsetterepresentant).

Eskild Moen (leiar), Gretha Rød og Magnhild Haugland går ut av styret.

– Det er ikkje noko dramatikk knytt til dette. Oppdraget me fekk frå dåverande politiske leiing i november 2022 hadde eit større omfang enn det eigarskapsutvalet sine medlemmer no hadde forventningar om at styret skulle bruka av tid på vervet, forklarer Eskild Moen til Grenda.

Kvinnherad kommune har 90 prosent av aksjane i Kvinnherad Vekstbedrift. Varaordførar Thea Vaage representerte kommunen under generalforsamlinga.

– Kvinnherad kommune har ei styreportal, og der er det lenge sidan nokon har skrive inn nye namn. Det er berre å senda ei melding til eigarskapsutvalet eller sekretæren om ein ynskjer å melda seg til styreverv, seier Thea Vaage til Grenda.

Ho sit i eigarskapsutvalet saman med Silje Nordtveit Olsen og ordførar Vegard Bjørnevik. Sekretær er næringssjef Grete Solheim.