Lagar til fleirbruksbane

Eidsmarka inkluderande utemiljø og leikepark vil ha på plass ein fleirbruksbane ved Halsnøy skule.

Ilag med Halsnøy skule og FAU Halsnøy vil dei laga ein ballbinge på 20x 40 meter med eit stort mål på kvar kortside. Ballbingen skal også ha basketkorg og to små mål på kvar langside.

– Dette blir ein fleirbruksbane der ein kan driva med fotball, basketball, håndball, tennis osb. på våren, sommaren og hausten. På vinterstid vert det moglegheit til å laga til ein isbane, heiter det i ei pressemelding.

Dette skal ein få til ved å støypa ein ringmur rundt som ballbingen skal stå på. Med tida vil dei også asfaltera banen, slik at ein kan spela tennis eller landhockey og gjera det lettere å laga til isbane om vinteren.

– Arbeidet vert gjort på dugnad av føresette og bygdefolk, og prosjektet har alt fått gode «sponsa» prisar på material til grunnmur mm, står det vidare.

Prislappen på fleirbruksbanen ligg på 500.000 kr. For å få til dette har Eidsmarka inkluderande utemiljø og leikepark, Halsnøy skule og FAU Halsnøy sveiva igang ein «Spleis».

I levekårsutvalet den 5. september vart det vedteke å tildela prosjektet 70 000 kr, noko som får dei eit steg på vegen.

– Her kan både privatpersonar og små og store verksemder gje ein sum. Banen er tenkt å vera til nytte og glede både i skuletid og på fritid for alle aldrar. Vi håpar at mange vil vera med på spleiselaget, heiter det i pressemeldinga.