Lågast arbeidsløyse i Kvinnherad

Med ei arbeidsløyse på to prosent av arbeidsstokken, var Kvinnherad den kommunen i Sunnhordland som hadde lågast arbeidsløyse i november.

Kvinnherad kunne i november visa til ein nedgang på fem i arbeidsløysa. Det gjer kommunen til ein av berre to Sunnhordland-kommunar som ikkje opplevde ein auke i talet arbeidsledige førre månad. Den andre kommunen var Sveio, som opplevde ein nedgang på éin.

Talet heilt arbeidsledige er no på 134 i Kvinnherad, som betyr at arbeidsløysa er på to prosent av arbeidsstyrken. Det er lågast i heile Sunnhordland.

– Snittet for heile Sunnhordland er på 2,7 prosent, som er lågare enn snittet både for Vestland (3,7 prosent) og landet (3,9 prosent), skriv Nav Sunnhordland i ei pressemelding.

 

Bekymra for langtidsledige

Men sjølv om regionen ligg eit godt stykke under landssnittet, er leiar Astrid Østerlid i Nav Sunnhordland bekymra.

– Vi ser ei utflating i arbeidsløysa og det er små rørsler. I november var det fleire heilt arbeidsledige, samstundes som det var ein nedgang blant dei delvis ledige. Vi forventar ikkje store endringar på arbeidsmarknaden komande månad. Det som bekymrar oss er langtidsledigheita, og den følgjer vi tett med på, seier Østerlid i ei pressemelding.

I november var det totalt 473 langtidsledige i Sunnhordland. Det utgjer over halparten av alle heilt ledige.

– Etter nedstenginga i mars var det forventa at langtidsledigheita ville treffa mange av dei som vart råka. Vi må hindra at den bit seg fast. Vi vonar at fleire permitterte vil koma attende i arbeid, men mange må nok orientera seg mot nye yrker, seier Østerlid.

Med langtidsledig meiner Nav personar som har vore utan arbeid og aktivitet i 26 veker eller meir.

– Vi oppmodar no personar som har vore lenge ledige om å vurdera moglegheitene på arbeidsmarknaden, og fleire er råda om å ta ei kompetanseheving. Vi trur også det blir naudsynt å auka bruken av Nav sine arbeidsretta tiltak for dei som er langtidsledige, seier Østerlid.