Lang kø for å røysta

Om ein skal døma etter køen i vallokalet på Husnes søndag ettermiddag, vert oppslutninga i årets val langt betre enn førre gong.

 

I 14-tida søndag var det fullt av folk i Kulturhuset Husnes. Dei skulle korkje på kino eller konsert, men var komne for å røysta i kommune- og fylkesvalet.

- Det har vore eit jysla tilsig og kø sidan vi opna. Eg trur det for ein stor del skuldast Søralløpet, for folk kjem rett derifrå for å røysta. Det er mange som har røysta i joggesko i dag. Det var før i tida ein måtte ta på seg finkleda på valdagen, smilte valfunksjonær Atle Helland.

11 valfunksjonærar var i sving på Husnes. Nokon ordna køen, andre hjelpte folk i sjølve stemmelokalet, stempla røystesetlane, eller sikra at setlane kom opp i urna.

- Vi må også passa på at det er nok røystesetlar til alle partia. Nokre parti held ut dagen, medan andre må etterfyllast, sa Helland som stod i vestibylen og ynska veljarane velkomne.

 

Søndagsrøysting

Inne i røystelokalet sytte leiar Gunnar Røssland for at alt var på stell.

- Det har vore ein jamn straum sidan vi opna. Eg vonar det er eit teikn på stort engasjement, og at valdeltakinga vert større enn sist. Vi har elles fått mange positive tilbakemeldingar på at det er mogleg å røysta om søndagen. Det er openbert mange pendlarar i Kvinnherad, opplyste Røssland.

Også han merka effekten av Søralløpet.

- Heldigvis er Søralløpet alltid samstundes med valet, humra han.

Ei av dei som nytta sjansen til å røysta på fridagen var Anne-Grethe Høisæther frå Herøysundet.

- Å finna kommunepartiet var greitt, men i fylkesvalet måtte eg tenkja litt. No skal eg inn og ta kyrkjevalet når eg fyrst driv på, fortalde ho.

Også frå Rosendal vert det meldt om godt frammøte i dag.

Måndag er røystelokala opne frå klokka 10 til 19. Hugs at alle resultat og intervju får du i Grenda si direktesending frå valvaka frå klokka 19.30 måndag.