Likar den norske modellen

I snart to månader har fleire skular i Kvinnherad hatt amerikanske studentar på utveksling. Og amerikanarane likar det dei ser.

Det er det siste dei gjer før dei skal heim og få vitnemålet. Dei åtte studentane frå Utah og Iowa har vore i Kvinnherad sidan oktober, og er no i den siste veka av utvekslingsopphaldet sitt.

Studentane har vore utplasserte på Rosendal ungdomsskule, Husnes ungdomsskule, Undarheim, Sunde og Valen skular. Dei fortel om undervisningsopplegg som er veldig ulikt det dei har i USA.

– Elevane her har meir fridom, og det har lærarane òg. Slik eg oppfattar det, ser det ut til at elevane både har og tar meir ansvar òg. Det ser ikkje ut til at dei misbrukar tillita dei har fått, seier Laura Bennet frå Utah.

– Me elskar den fridommen som ein har her. Men me er usikre på om slik fridom ville fungert heime. I USA er det meir strukturert i steg for steg-undervisning. Så om me hadde gitt dei fridom, ville dei neppe visst korleis dei skulle gjera det, vurderer Rebekah Jensen og Emily Durlin.

Klassestyringa blir peika på som ulempa med fridommen til elevane.

– Og så kunne synest eg lærarane burde oppmoda elevane til å lesa meir, seier Christy Cox.

 

Opne elevar

Dei oppfattar dei kvinnherske elevane som opne, og at dei har eit langt meir venskapeleg forhold til lærarane – og utvekslingsstudentane – enn det dei er vane med i USA.

– Og så likar dei å snakka engelsk med oss. Sjølv tredjeklassingane gjer solide forsøk på å fortelja oss kva dei gjorde på dagen i førevegen, smiler studentane.

Studentane har budd som næraste naboar til Rosendal ungdomsskule. Det har innebore buss til og frå skulen for dei fleste av dei.

– Men Rosendal har vore heilt passeleg stort for oss. Her er alt det me treng. Og vil me ha noko større ein dag, så tar me bussen til Husnes, forklarer Justin Mills.

– Det har vore heilt utruleg å bu her i hytta i sjøkanten og ha denne utsikta. Det er veldig vakkert, og det er veldig forskjellig frå det me har heime. Der er det dalar og ørken, og på langt nær så grøderikt som dette, sluttar studentane.