Liven vann julekonkurranse

Liven Santiago vart den heldige vinnaren av Rosenform sin Facebook-konkurranse, der premien var å  velja ut klede for 5.000 kroner.

Gunn Kleppe på Rosenform hadde konkurransen gåande i tre veker på Facebooksida si, og til og med folk utanfrå fylket freista lukka i kommentarfeltet. Liven Santiago frå Valen vart den heldige vinnaren, og måndag fekk ho 15 minuttar på seg å plukka ut plagg til totalt 5.000 kroner i klesbutikken i Skålagato. Imponerande nok brukte ho berre 5 minutt på å plukka ut bunken med klede, der eit av kriteria var at alt måtte få plass i éin handlepose.

Kvar kommentar på Facebook-innlegget fungerte som eit lodd i konkurransen.

– Eg kom til over 700 kommentarar, til òg med frå folk i frå Sogn som gjerne ville koma eins ærend, så det er veldig kjekt, sa Kleppe.

– Kor heldig eg er, sa ei strålande glad Santiago og haldt fram:

– Det var dotter mi som gjorde meg merksam på at eg hadde vunne, og eg tenkte det sikkert gjaldt ein gryteklut eller noko. «Nei, du har vunne konkurransen på Rosenform for 5.000 kroner!» Har eg!?, lo Liven, som no har ei handfull med ulike antrekk ho kan smykka seg med.