Livestreaming av gudstenester i påsken

Påsken er her, den store høgtida innan kristendommen. Dette kjem til å verta ei påskehøgtid dei fleste av oss seint vil gløyme. Det meste er annleis og ulike tradisjonar må dette året verta lagt til sides grunna korona-epidemien.

I Kvinnherad har me 12 kyrkjer, og frå Palmesøndag til og med 2. Påskedag var det planlagt ikkje mindre enn 17 gudstenester/samlingar. Dei fleste av desse er heilt avlyst, men det vert gjennomført eit par enkle dåps-gudstenester med kun dei næraste til stades også i påsken. I nokre kyrkjer vil det òg verta lagt til rette for open kyrkje nokre timar ein dag i påskehelga. Oversikten finn her.

Men Langfredag og 1. Påskedag ynskjer me å invitera oss heim til deg med ei påskehelsing, med musikk, song, bibeltekstar og påsketankar. I den digitale kvardagen me lever i har mange nytta internett til å halda kontakten med kvarandre den siste månaden. Denne moglegheita ynskjer me i kyrkja òg å nytta oss av.

I samarbeid med både Kvinnheringen og Grenda, samt lokale mediefolk med Oddbjørn Kloster i spissen, vil det fredag kveld vera mogeleg, via skjermen, å verta med på Langfredagssamling frå Husnes kyrkje kl. 20. Organist Marit Lindekleiv har fått med seg ulike aktørar som formidlar påsken sin bodskap gjennom ord og tonar. Søndag er det påskedag. Då vil jubeltonar og ord til trøyst og oppmuntring lyda frå Kvinnherad kyrkje kl. 11. Kantor Eva Megyesi har fått med seg musikalske krefter til å delta her og sokneprest Kjersti B. Boge leier oss gjennom gudstenesta.

Sendingane vil du finne både på Kvinnheringen og Grenda sine nettsider, samt på Facebook. Lokalavisene har vore så storsinna at begge sendingane vil ligge opne for alle, slik at ein ikkje treng abonnere for å sjå.

Me håpar at mange kvinnheringar, ja, andre og sjølvsagt, vil setja pris på dette tilbodet. I ei tid der ein ikkje kan oppsøke fellesskap i kyrkje eller bedehus på vanleg vis, håpar me at dette kan verta ein fin og verdig måte å feira påske på. Me ynskjer at du skal få mogelegheit til å kjenna at du ikkje er åleine i denne tida som opplevest både utfordrande og vanskeleg for mange.

Espen Eckbo sin humoristiske karakter, Asbjørn, sa det så bra: «Det er nå vi må vise at vi står sammen - ved å sitte hver for oss…»

 

På vegna av kyrkja

Jan-Ove Fagerheim