– Lokale brannstasjonar

Eg las i lokalavisene for ei tid attende. Der var det slik eg forstår eit forslag om at bygdelag i kommunen kunne overta brannstasjonen i ulike bygder. Dette tenker eg må vera eit forslag basert på økonomi, utan at eg kjenner saka godt. Dei ulike oppgåvene brannstasjonane har rundt omkring kjenner eg heller ikkje særs godt til. Likevel har eg nokre tankar kring dette.

At det kostar å drifta brannstasjonar og utstyr som føl med, det forstår eg. Er det då slik at desse kostnadene skal påleggjast ulike bygdelag i kommunen? Sjølve bur eg i ei bygd som må reknast som utkant og grisgrent strok, Åkra. Eg tenker situasjonen er ganske lik rundt i mindre bygder, men kanskje eg tek feil?

Eg trur (understrekar trur) at situasjonen i mindre bygder er:

- få personar som er viljuge å ta på seg oppgåver i bygdelagsarbeid, friviljug lagarbeid og andre arrangement.

- slitasje på få personar til tider.

- få yngre krefter som kjem til, då det er unntaket at dei unge flyttar tilbake. Og om yngre tek på seg oppgåver for bygdelaget, er det ikkje sikkert dei fysisk bur i Åkra heller. Då er dei uansett utelukka oppgåver i tilknyting til brannstasjonen. Men dei er ein ressurs i bygdelagsarbeidet. Dessutan har gjennomsnittsalderen i bygda Åkra auka mykje siste åra. Ein kan vel ikkje om folk ynskjer å delta i bygdelagsarbeidet påleggja dei brannstasjonsoppgåver i tillegg?

- bygdefolk i mindre bygder har fleire oppgåver allereie, som til dømes 17. mai, lokale arrangement for å halda «liv» i bygdene. I Åkra kan nemnast pinsearrangement med både kyrkjesøndag og idrett. Kafédrift på dugnad og anna lagsarbeid som idrettslag og 4H klubb er andre oppgåver bygdefolket driv.

- til tider kan det vera personar som har fleire verv samstundes.

- kanskje slikt arbeid vert meir fordelt i større bygder, tenkjer eg. Men eg er ikkje sikker.

 

Om ulukka er ute

Uansett: Skal drift av brannstasjon verta ei oppgåve for bygdelag ut frå kvar ein bur i kommunen? No er det slik at brannstasjonen i Åkra, slik eg forstår, har lokale tilsette som er frå bygda. Desse er kursa, motiverte og utdanna folk. La oss behalda dei i jobben, og ikkje at bygdelaget overtek.

Om ein brannstasjon ligg i Rosendal, Fjelberg, Husnes eller Åkra, bør den driftast av kompetente, kursa personar. Eg seier med dette ikkje at bygdefolk ikkje er kompetente, for det er dei! Men, det bør vera folk som har lyst, motivasjon og kunnskap som er knytt til brannstasjonane. Det er òg viktig tryggleiksmessigt at me beheld stasjonen i Åkra, sjølv om den nok i større samanheng ikkje stiller i elitedivisjonen i høve utstyr og modernisering (utan at eg i detalj kjenner innhaldet i stasjonen).

Skulle ulukka vera ute er det langt frå Husnes til Fjelberg og frå Rosendal til Åkra når minuttar tel. Det er ikkje sikkert stasjonen i Åkra kan stoppa ein brann frå å gjera skade, men kanskje den kan redusera skaden. Difor er det viktig med ein operativ stasjon i nærområdet.

Har òg høyrt at personalet knytt til brannstasjonen i Åkra har vakt på hjartestartar i bygda. Dette tenker eg bør vera ei oppgåve vidare for stasjonen. Det er då folk som har kompetanse på dette. Og ikkje noko ein må påleggja bygdelag. Eg trur det blir endå meir vanskeleg å få folk til oppgåver i bygdelaget om å drifta og kosta brannstasjonen også vert ei av dei.

 

Budsjetta

Eg ser nokre politikarar stiller spørsmål om kompetansekrava kan justerast ned om bygdelag tek over både på personale, men òg slik eg oppfattar det, i høve det fysiske ved sjølve stasjonen. Dette er viktige spørsmål. Då vil nok utstyr bli dårlegare / meir mangelfullt på sikt kanskje? Eg lurer.

Mindre brannstasjonar slit kanskje med å få folk til stillingar ein lyser ut. Då er det ekstra viktig å ta vare på dei folka som er viljuge å ta på seg ein slik jobb. Og ikkje påleggja kostnadar og arbeid over på bygdelaga, som sikkert allereie har nok. Bygdelaga rundt har vel ikkje nokon buffer i budsjetta sine til å setja av til drift av brannstasjonar?

Vonar politikarar og andre tenker seg godt om i denne saka. Eg har ein mistanke om ikkje bygdelaget kan /vil overta, då er brannstasjonen i bygda historie innan, tja tenker, 5-10 år. Den som lever får sjå!

 

Lesarbrev av Anita V. Oppedal, innbyggjar i Åkra.

 

[gravityform id="11" title="true" description="true"]