LOS-konsernet kjøper Ølve Elektro

Den tradisjonsrike kvinnheradbedrifta Ølve Elektro blir frå i dag av ein del av det Bømlo-baserte LOS-konsernet.

– Vi har vore på utkikk etter ein større aktør å slutta oss til, og LOS Elektro har kome oss i møte på ein måte som gjer oss overtydd om at dette er eit godt val, seier dagleg leiar og hovudaksjonær i Ølve Elektro, Stig Håvik i ei pressemelding.

I 1980 vart Ølve Elektro etablert av Alf Bjørkelund, den gong under namnet Ølve Elektriske. 16 år seinare, i 1996, kjøpte Stig Håvik majoriteten av føretaket og aksjeselskapet Ølve Elektro såg dagens lys. I dag har bedrifta åtte tilsette, men reknar med å auka talet på tilsette i åra som kjem.

– LOS Elektro er svært nøgd med denne utvidinga av vår aktivitet her i distriktet, seier styreformann Arne Mæland i pressemeldinga.

 

Kompetansedeling

Stig Håvik seier i pressemeldinga at vinsten ved å få LOS-konsernet inn på eigarsida i Ølve Elektro vil gje synergiar som kompetansedeling, fellesfunksjonar, stordriftsfordelar, ISO-sertifisering og ekspansjon.

– LOS-konsernet har imponert oss med innovativ, hyggeleg og offensiv organisasjon. Dei har store prosjekt både nasjonalt og internasjonalt. Det gjer at vi i LOS Ølve Elektro også lettare kan knyta oss til nye medarbeidarar som ynskjer å ta del i alle desse spanande prosjekta, seier Håvik.