Løysing på hytteproblemet
Eg har ei løysing på dette hytteproblemet, som styresmaktene skal få gratis:
Sidan 2006 har nybygde hytter vore større enn nybygde hus. Då var gjennomsnittsarealet på ei hytte 102 kvadratmeter, medan på Austlandet var gjennomsnittsarealet på ein primærbustad 73 kvadratmeter.
Artikkelen held fram under annonsen.
Stortinget bør endre loven slik at det største huset automatisk vert primærbustad, og bind eigar til den kommunen der denne bustaden er. Rekkjehuset i Bergen eller Bærum vert dermed sekundærbustad, altså hytte. Bustadkommunen vert den kommunen der den tidlegare hytta ligg!
Soleis vil til dømes Vinje få mange nye innbyggjarar og inntekter frå desse, medan sentrale kommunar vil få færre innbyggjarar og mindre press på sin infrastruktur. To fluger i ein smekk!
Vinje vil då kunne byggja opp sitt tilbod, medan Bærum kunne redusera tilsvarande. Eit desentraliserande tiltak!
På sikt vil det truleg oppstå eit press for å flytta arbeidsplassar ut frå byane, til dei strok av landet der folk no bur, etter den nye loven! Ikkje berre to fluger, men eit Colombi egg!
Slikt kan ein finna på når alt er stengt, og vi sit inne i timevis!
Lars Børge Sæberg