Kult trivselstiltak ved Halsnøytunet

I morgontimane la ein liten kalveflokk søndagsturen sin til Halsnøytunet. Dette medførte små forseinkingar i frukosten blant bebuarane der.

Irene H. Bjørgen, som er hjelpepleiar ved Halsnøytunet, dokumenterte besøket med eit mobilbilete. Dette la ho ut i Facebook-gruppa «Kva skjer på Halsnøy?», der ein mellom anna kan melde frå om ting som er mista eller funne. Dei som hadde mista fem kalvar vart såleis kjapt informert om kor desse kunne finnast.

– Var eit koseligt besøk for bebuarane på Halsnøytunet. Så vidt dei hadde tid å eta frukost, skreiv Bjørgen under biletet.

Vidare kom det fram at dei også hadde luffa rundt på Sæbø dei to siste dagane, og sjølv om det berre blir spekulasjonar, kan ein såleis anta at kalvane er ein del av eit nyoppretta trivselstiltak for lokalbefolkninga i Sæbøvik.

Seinare på dagen kunne Bjørgen oppdatera Grenda på status-Ku (status quo): kalvane var kome til rette.

– Eigaren kom og henta dei. Kanskje dei ville gi litt kvardagsglede for bebuarane? Var iallefall eit koseleg besøk. Litt kalvadans blei det òg.