Lynet drap seks geiter

Lynet tok livet av seks geiter ved Eggjo oppom Kjeldestøl søndag kveld.

Det var ikkje noko kjekt syn som møtte Joar Tveito seinare på kvelden. Då gjekk han opp mot Skålafjell for å gje mjøl til geitene. Han såg og lokka på dei, men ingen av dei seks dyra rørte på seg. Då han kom nærare såg han at alle låg daude.

 

Skremt av synet

– Dette var veldig trist. Det er ikkje ofte lynet slår ned på den måten, og eg må seia eg vart litt skremt av synet som møtte meg. Dette er jo eit turområde der det ofte går folk, seier Joar.

Mor hans, Edle, driv geitegarden oppom Kvinnherad kyrkje, og er ein av ganske få som driv med mjølkegeiter i kommunen. Joar er odelsgut, og er rett rundt hjørnet til å overta garden. Dei seks drepne dyra var ikkje mjølkegeiter, men utegangarar: tre bukkar og tre geiter.

 

Slo ned i gjerdepåle

Torevêret søndag kom etter eit veldig byevêr, og det var difor uvanleg vått i området. Lynet hadde slege ned i ein gamal gjerdepåle og følgt strengen som hang på han. Dyra har truleg lege inntil pålen. Joar fortel at lynet hadde laga ei stor grøft då det slo ned.

– Først trudde eg ein laus hund hadde teke dyra, og tenkte at nokon hadde grøfta sidan det såg slik ut. Men eg skjønte raskt at det var lynet som hadde skulda. Lynnedslaget hadde sprengt opp molda så det såg småkratrete ut, fortel odelsguten som seier han fekk seg ein støkk søndag kveld.