Må i fengsel etter ei rekkje lovbrot

Ein mann frå Kvinnherad er dømt til 45 dagar fengsel etter tjuveri, ruskøyring, bruk av narkotika og forulemping av tenestemann.

Mannen, som er i slutten av 30-åra, vart i Sunnhordland tingrett dømt for ei lang rekkje med forskjellege lovbrot. Han vart dømt for to butikktjuveri, tjuveri av to plantar frå ein blomebutikk og for å ha stole ein båt i Omvikdalen som han seinare parkerte i Husnes båthamn.

Vidare er han dømt for å ha køyrt moped i rusa tilstand ved to forskjellege høve, samt for bruk og oppbevaring av narkotika. I tillegg til dette er han dømt for å ha bert kniv offentleg og for å forulempa politiet med skjellsord.

For det må han inn i fengsel i 45 dagar og betala ei bot på 5.000 kroner.