Må svara på kritikk rundt tilsettinga av Peder Sjo Slettebø

Kontrollutvalet har motteke fleire reaksjonar etter at Peder Sjo Slettebø vart tilsett som rådgjevar i sektor for samfunnsutvikling. Kommunedirektøren må no svara for korleis tilsettingsprosessane i kommunen eigentleg går føre seg.

Då søkjarlista til stillinga vart offentleggjort var ein av søkjarane, mann 35, unnateke offentlegheit. Under ein pressekonferanse 31. mai vart det kjend at mann 35, Peder Sjo Slettebø, var tilsett i stillinga. At eksordføraren var unnateke offentlegheit er blant tilhøva som det no blir stilt spørsmål ved.

Tok opp saka i kontrollutvalet

Irene Nilsen Sjo (Ap) tok opp saka i kontrollutvalet sitt møte førre tysdag, og fleire spørsmål rundt tilsettinga er førelagt kommunedirektøren. Kontrollutvalet har fått fleire henvendingar om tilsettinga, og valte difor å stilla spørsmål om sakshandsaminga har vore god nok i denne prosessen.

– Kontrollutvalet går ikkje inn i einskildsaker som gjeld tilsettingar, men på grunn av henvendingane me har fått, valte me å stilla spørsmål ved prosessen rundt tilsettinga. Det er oppgåva vår å sjå til at sakshandsaminga går riktig føre seg, seier Knut Førland, leiar i kontrollutvalet.

Han slår fast at dei har tillit til at kommuneadministrasjonen gjer gode vurderingar i tilsettingsprosessar, men understrekar at når fleire reagerer på vurderingane som blir gjort er det grunn til å sjå på saka, slik kontrollutvalet no gjer.

Spørsmåla som kontrollutvalet har stilt til kommunedirektøren går på kva som skal til for at søkjarar blir unnateke offentlegheit, samt kva som må til for å sjå bort frå dei formelle krava til kompetanse som står i stillingutlysinga. For denne stillinga var det sett opp krav om høgare relevant utdanning på masternivå.

Dei ventar svar til neste møte, som blir etter sommaren, og Førland peikar på at svaret dei får ikkje vil påverka tilsettinga.

– Om nokon av dei andre søkjarane føler seg forbigått, må dei klage saka inn til sivilombodsmannen. I verste fall vil kommunen få kritikk for tilsettingsprosessen, men heller ikkje det vil endra på tilsettinga. Den er allereie gjort, sluttar han.

Spørsmål om kompetanse

Arbeiderpartiet har hatt interne diskusjonar rundt problemstillinga, og har mellom anna skrive eit lesarbrev med spørsmål til kommunedirektøren.

«Om det vert utlyst ei stilling med krav om kompetanse på mastergradsnivå, kor mykje relevant realkompetanse skal kompensere for dette, eit år, to år? Dessutan, kva er relevant realkompetanse», spør dei mellom anna i dette.

Det er Lise Røyrvik, nestleiar i Arbeiderpartiet, som har sendt brevet med spørsmåla til administrasjonen. Røyrvik seier til Grenda at partiet har diskutert om det er rett å tilsette folk basert på om dei har det rette nettverket, noko dei meiner å ha sett ved fleire høve.

Røyrvik uthevar vidare at kritikken deira ikkje har noko med den nytilsette å gjera, men med prosessen rundt.

– Når ein ser at det er fleire søkjarar som har den fagkompetansen som dei spør etter, er det grunn til å stille spørsmål ved tilsettinga, seier ho og held fram:

– Den førebelse responsen frå kommuneadministrasjonen er at arbeidserfaring og personlege eigenskapar veg opp for fagkompetanse.

– Kva meiner de i Arbeiderpartiet om denne vurderinga?

– Me tenkjer at utdanning bør prioriterast høgare, sluttar Røyrvik.

Peder var den beste kandidaten

Då det vart kjend at det var eks-ordføraren som skulle tiltre stillinga forklarte sektorleiar Anbjørn Høivik at det særskilt er tre felt dei ynskja å imøtekoma i samband med kvalifikasjonar; fagbakgrunn, realkompetanse og personlege eigenskapar.

– Det er sjeldan at nokon får full klaff på alle tre, så desse felta må då sjåast opp mot kvarandre. Det me har lagt ekstra vekt på i denne tilsettinga er dei to siste, sa Høivik under pressekonferansen 31. mai.

Kommunedirektør Ragnhild Bjerkvik understrekar per telefon at dei ser på den heilskaplege kompetansen ein kandidat sit på når dei gjer tilsettingar i kommunen.

Når det gjeld kompetanse-kritikken svarar Bjerkvik følgjande:

– I ein tilsettingsprosess må me sjå kandidaten i forhold til dei arbeidsoppgåvene som føl med stillinga, og nokre gonger er det slik at realkompetanse kan trumfe fagkompetanse. Peder vart vurdert som ein god kandidat, og etter intervjurunden sto han att som den beste kandidaten til denne stillinga, seier Bjerkvik, før ho legg til at politisk erfaring ikkje må bli ein hemsko for at gode kandidatar kan tilsetjast.

Vidare forklarar ho at dei har hatt ein intern gjennomgang, der det er gjort vurderingar for å kvalitetssikre tilsettinga.

– Me har hatt ein open og ryddig prosess. Alle søkjarar har rett til å be om å bli unnateke offentlegheit, og det blir gjort juridiske vurderingar i kvar enkelt sak.