
Magne (72) omkom etter hjullastar-ulukka
Livet stod ikkje til å redda.
Magne Huglen, som ville fylt 73 år denne månaden, døydde på Haukeland sjukehus seint om kvelden 15. oktober av skadane han blei påført.
– Ein mini-hjullastar kom køyrande ned frå ein privat veg og inn mot kommunevegen, då den køyrde utfor vegbanen. To handlekraftige ungdommar kom køyrande og oppdaga at noko skjedde. Dei stoppa, og fekk auge på ein mann som låg i vegen, fortalde politistasjonssjef Sigurd Børve tidelgare denne veka.
Huglen blei frakta til Haukeland sjukehus, men livet stod ikkje til å redda.
"Politiet etterforskar ulukka vidare, med mål om å klargjere årsaka", står det i ei pressemelding frå politiet.
Ei eldsjel
Huglen er for mange kjent som Dønhaugbonden, og arrangerte mellom anna i ei årrekkje påskedans på låven sin. I tillegg lånte han stadig ut Dønhaugkjellaren til store og små arrangement, mellom anna til Husnes Jazzklubb og Kvinnherad mållag.
Garden med både låve og bakkar har også år etter år husa Festidalen.
Utover å tilføra mykje til det kulturelle livet i Kvinnherad, var han også i nokre år folkevalt og aktiv i lokalpolitikken som representant for Arbeidarpartiet. Dei seinare åra markerte han seg også som eit aktivt medlem i Eldrerådet.
Huglen var opphavleg frå Huglo, og overtok garden på Dønhaug etter tanta og onkelen sin.