Måtte få hjelp frå stasjonar i nabokommunane:
– Takksame
Brannvesen frå Ølve, og etterkvart Kvam, rykte ut til brannen. Brannsjef Øyvind Ousdal og innsatsleiar Are Blokhus rykte ut frå sørsida.
Onsdag om lag klokka 18.30 fekk Kvinnherad brann og redning melding om at eit løebygg stod i full fyr på Tveitane på Hatlestrand.
Brannvesen frå Ølve var først på staden, men fekk raskt hjelp frå kollegaane ved Oma brannstasjon i Kvam.
Då Grenda prata med brannsjef Øyvind Ousdal like over klokka 19, var han på ferja på veg over fjorden. Han kunne fortelja at det var kontroll på brannen, men at sløkkingsarbeidet framleis stod på.
– Det er snakk om ei løe, heldigvis ingen dyr i den. Det var spørsmål om spreiingsfare til bustadhus i starten, og grunna dårleg tilgang til sløkkevatn blei det beslutta å tilkalla bistand, opplyste brannsjefen.
Lokalt brannvesen fekk etterkvart til å henta vatn frå ei elv i nærleiken.
Det var ikkje snakk om fare for verken menneskeliv eller dyreliv, men alle tre naudetatane var i sving, og ein mengde utrykkingskøyretøy var på staden.
(Saka held fram under bildet)
Nabohjelp
Brannsjefen, som saman med innsatsleiar Are Blokhus var på staden for å hjelpa til med å leia arbeidet, er glad for at kollegaane i nabokommunane kom raskt til, og rosar dei for bistaden dei gav.
– Dei kom kjapt til med ein kombibil med 10.000 liter, og i tillegg bad vi om bistand frå Tysnes. Etterkvart blei det vurdert at det ikkje var behov for dei likevel.
– Vi er takksame og heldige for den gode hjelpa frå kommune-naboane våre. Når det skjer noko på nordsida av fjorden er det ikkje alltid like lett, sluttar han.
Sløkkinga pågjekk i eit par timar, og om lag klokka 21 var det meste av synlege flammar vekke,. Ein kunne då gå over til rutinemessig vakthald på staden.
Brannvesen frå Oma returnerte kort tid etter, og Ousdal opplyste til Grenda sin utsende på staden at det vil bli verande to til tre personar av det lokale brannvesenet utover natta.
