Med Turboklubben på tur
Sidan januar har Turboklubben Husnes samlast annankvar måndag for å gå på turar i nærområdet. - Ungane tek styringa, så det blir ikkje alltid slik vi vaksne har tenkt, smiler Mari Varanes.
Så langt har turane gått til lysløypa i Herøysund, til Borvikstranda og til Toftåsen. Turen som Grenda sleng seg med på er lagt til skogen ved Hellandselva. Ingen strabasiøs eller krevjane tur, men ungane har meir enn nok å bryne seg på.
Dagens prosjekt var å lage barkebåt og fyre i bål. Nokre av ungane var røynde med begge deler, og meldte seg straks som frivillige læremeistrar med knivbruk og oppfyringsansvarleg. Initiativa vart godt motteke.
Artikkelen held fram under annonsen.
– Eg fekk kniv då eg slutta i barnehagen, fortalte Knut Grønstøl.
Det same gjaldt også for Irmelin Skibenes Almestad, som seinare gav bladfyken god opplæring i fornuftig knivbruk.
– Du må spikka i frå deg, sånn. Og når du skal gi frå deg kniven må du gjera slik, sa ho, og haldt forsiktig i knivbladet, med handtaket ut.
For dei yngste
Turboklubben Husnes er eit aktivitetstilbod under Barnas turlag, som passar for barn i barnehagealder og tidleg skulealder. Alle ungane må ha med seg ein vaksen, noko som bidreg til at familiar får gjort kjekke ting ilag.
Turleiarane i Turboklubben Husnes, Mari Varanes, Anne Marthe Grønstøl og Marina Louise Rasmussen, legg ut informasjon om kvar tur nokre dagar på førehand, så melder ein seg på dei turane ein vil vera med på.
– Me har ei maksgrense på 20 personar per tur, og så langt har tre av fire turar vore fullteikna i løpet av eitt døgn, noko som er veldig kjekt. Det kunne sikkert vore ein klubb i kvar bygd, så om det er nokon som ynskjer å starte opp er det berre å ta kontakt, så kan eg hjelpe dei i gong, forklarte Mari medan ungane plukka barn frå furuene i skogen.
– Så er det jo veldig godt å komma seg ut på ettermiddagen og å vera litt sosial, legg ho til.
Enkel og god turmat
Ungane vrimlar ned mot elva, klare for å teste ut barkebåtane sine. Nokre seglar flott av gårde medan andre set seg fast i det steinete stryket. Då barkebåtane har sigla ned Hellandselva er det klart for å fyra i bålet lenger inne i skogen.
Artikkelen held fram under annonsen.
– Veit du at før hadde dei ikkje tennbrikettar? spør Knut røynd.
Han fekk fyr på bålet trass i at det bles, før ungane fekk kvar si banan som dei fylte med sjokoladebitar før den vart pakka inn i folie og grilla på bålet. Skumringa fall medan den kulinariske turmaten vart eten.