Mekk Husnes flyttar ut av storsenteret

28. oktober kan Mekk Husnes ynskja kundane velkomen til ein heilt ny butikk i det tidlegare Europris-lokalet på Husnes.

– Det gjer vi med ein idé om at vi får eit lokale som ligg strategisk til like ved Opsangervegen med eigen parkering rett ved inngangen. I tillegg får vi eit eige lager i tilknyting til butikken, noko vi ikkje har hatt tidlegare, seier butikksjef Øyvind Grundberg i Mekk Husnes.

Båt og motor-satsing

Mekk Husnes har siste opningsdag på Husnes storsenter torsdag 14. oktober, før dei går laus på ein større flyttejobb dagen etter.

– Det er nokon tonn med varer som skal flyttast, ler Grundberg før han held fram:

– Eg både gler og kvir meg til dette. For det er ein såpass stor jobb. Men vi får hjelp frå IL Trio til å pakka ned varer, og så kjem det folk frå vareleverandørane hit for å hjelpa til med å setja ut varene i den nye butikken, seier han.

Det nye lokalet vert ein halvdel av det tidlegare lokalet til Europris i fyrste etasje av Kvadraten.

– Vi skal ha den halvdelen som ligg nærast Byggern Teigen. Lokalet i seg sjølv vert ikkje så mykje større enn det vi har i dag, men vi får meir veggplass og får med det brukt lokalet på ein betre måte. I tillegg så har vi eit ynskje om å satsa meir på båt og motor framover, og etter flyttinga får vi meir plass til det, seier Grundberg.

Opningsfest med overraskingar

Butikksjefen har tru på at dette er noko som vil gjera kvardagen enklare for Mekk.

– Vi håpar jo at det skal bli betre, men ein veit jo aldri. Men eg meiner at det er ein sjanse verd å ta, smiler han.

Butikken vil halda stengt dagane mellom 15. og 28. oktober.

– Flytting let seg ikkje kombinera med å ha ope. Det er sjølvsagt litt kjedeleg, men samtidig nødvendig. Så er det klart at om det er kundar som har desperate behov, så stiller vi opp. Elles så kan eg ynskja både gamle og nye kundar velkomen til det som kjem til å bli ein knallfin butikk med ein god del overraskingar på opningsdagen 28. oktober. Då vert det kanskje til og med mogleg få seg eit kakestykke, sluttar butikksjefen.

Med Mekk ut av senteret, så vert også eit stort lokale ståande tomt i hjarta av senteret. Senterleiar Terje Børtveit fortel at dei jobbar med å få fylla lokalet.

– Vi jobbar sjølvsagt med å fylla opp lokalet etter Mekk, men har ikkje noko konkret å koma med i dag, seier Børtveit.