Mogleg ny aldersrekord

Kolla som låg død i Rosendal før helga kan mogleg vera den eldste hjorten som er registrert i Norge.

Det funderer viltforvaltar Leif Trygve Varanes på. Han tok prøve av dyret på fredag.

– Det kan tenkjast at ho døydde av alderdom. Eg tok med kjeven for å få sjekka alderen, og lurer på om det kan vera ny aldersrekord, for det var eit skikkeleg gamalt dyr, seier han til Grenda.

Varanes opplyser at den norske aldersrekorden for koller høyrer til i Kvinnherad. Den vart sett av ei kolle som vart målt til 28 år etter at ho vart påkøyrd. For å vurdera alderen er tennene det fyrste ein sjekkar. Det er der Varanes fann dei fyrste hinta om at det no kan vera sett ny rekord.

– Det var berre stubbane igjen av framtennene, det var heilt nedslitne. Eg ser jo ein del kjevar i løpet av året, og kvart år får vi inn nokre dyr som er eit par og tjue år gamle. Til samanlikning ser denne kolla eldre ut.

Varanes fortel at kollene normalt blir eldre enn bukkane.

– Ein bukk på 15 år er gamal, og det er svært sjeldan dei vert eldre enn 20. Men eg meiner å hugsa at det er felt ein bukk på 21 år her i Kvinnherad, seier han.