«Monsterbrua» - endeleg ferdig
Etter månader med arbeid, har endeleg Audhild Handeland Rosnes fått skikkeleg veg fram til huset. Mange timar med dugnad, og arbeid frå Holmedal Maskin, er lagt ned i brua.
Ved Osen, like ovanfor Handelandsjøen, ligg huset til Audhild. Den einaste måten å koma seg, var over ei gamal, slitt bru. Mange våga ikkje køyra over brua, verken bilar eller utrykkingskøyretøy. Laurdag kunne dei stolt gå over den nybygde brua. Det vart feira med snorklypp, tale og rømmegraut.
Artikkelen held fram under annonsen.
- Endeleg har me fått oss ny bru. No kan både bilar og ambulanse koma fram. Eg må takka mamma og pappa, som har stått på. Det har vore mange søvnlause netter og mykje frustrasjon i prosessen for å få dette i hamn, seier eldste sonen til Audhild, Håvard Rosnes.
Det var barnebarna til Audhild, Tuva og Tina, som hadde fått i oppgåve å klyppa snora. Tina hadde kledd seg i vikingkjole for høve. Før dei klyppa snora, takka Audhild alle som hadde vore med.
- Dette er ein gledens dag. Ei stund kalla eg den «Monsterbrua», men no er den eit kunstverk, skøyar Audhild og seier vidare at ho vil takka alle naboane. Me har fått ei utruleg fin bru og ein flott veg ut av dette arbeidet.
Farleg bru
Audhild er oppvakse på Osen. Opphavleg var det Bestefar hennar som kjøpte hus her. Far hennar overtok etter han, og i 1950 vart ho fødd.
- Når eg var 16 år, byggja far min den gamle brua. Me fann ein stein ved brua, kor det stod 1966, fortel Audhild.
Dei som budde på Osen, var veldig vant til den gamle brua. Men Audhild må innrømma at ho var litt nervøs når ho skulle få besøk.
Artikkelen held fram under annonsen.
- Elva kan bli ganske stor. Når me hadde flaum, jaga eg alle dei andre ut av bilen og køyrde over den aleine, seier Audhild.
Med god hjelp av Kjell-Tore Holmedal, bestemte ho seg for å byggja ny bru.
- Holmedal fekk tak i NVE, som kom på synfaring. Så tok han kontakt med Herlaug Skjelnes. Så kunne bygginga endeleg byrja. Resultatet vart kjempe flott. Alle som bur her nede er godt nøgd med ny veg, og ny flott bru, avsluttar Audhild.
Etterpå samlast familien med vener og naboar for å eta rømmegraut.