Motor-moro

Snedne bilar og vågale sjåførar sytte for mykje moro på vårmønstringa til amcarklubben i Kvinnherad på Husnes 1.mai.

Det var tjåka fullt av blanke glis og motorinteresserte folk i alle aldrar på Solplassen heile dagen. Då det leid ut på ettermiddagen, samla det seg mange folk og bilar ved Hellandsbrua for å beundra både gamle og elegante, og nye og spreke bilar svinga ut frå krysset og opp mot Stripo, ein og ein.

Sjølvsagt med litt røyk og svarte striper i asfalten som resultat. Eit par bilar tok nokre piruettar i krysset før dei gassa på oppover bakken, og dei tøffaste motorsyklistane steila på bakhjulet for å visa seg fram til folkemengda.