Utsett til januar: Musikk, glødepinnar og rulleskøyter

Laurdag 20. november inviterer Rosendal Bygdelag elevane ved Malmanger skule til Roller disco.

Arrangementet er lagt til gymsalen i Rosendal, og er delt opp i tre aldersbestemte grupper. Frå klokka tolv er det ope for elevar i 1. og 2. klasse. Dei kan då rulla til grom musikk i to timar, før elevane frå 3. og 4. klasse kjem på banen. Elevane frå storskulen får avslutte showet, og klokka 18 på kvelden vil musikken stilna og parketten få fred.

– Det er Arnout som kom på ideen, då han har erfaring frå det frå før. Men dette er jo veldig nytt, så vi er veldig spente på korleis det blir, seier Stine Hatteberg frå Rosendal Bygdelag.

Arnout Ijzermans har ikkje berre kome med ideen, men også vore konsulent på kor lang tid kvar gruppe treng til å rulla.

– To timar er nok, det er tungt å stå så lenge, fortel Hatteberg vidare, og peikar såleis på at hendinga ikkje berre er kjekk og sosial, men at den også byr på ein klekkeleg dose fysisk aktivitet.

Tanken er å pynte lokalet med lys og diskokuler, og setje opp benkar som borna kan slappe av på når dei treng ein pause frå dansegolvet. Borna vil få gratis drikke og glødepinnar, populært kalla glowsticks. Dei vil også få lov å påverke spelelista for høvet.

Gler seg veldig

Ho legg til at tilbakemeldingane så langt er veldig positive, og at borna gler seg veldig. Det er allereie kome førespurnad frå barnehagen om det ikkje blir rulledisko, også for dei minste.

Påmeldingsfristen er sett til 15. november, og det ein må syta for sjølv er reine rulleskøyter og hjelm. Bygdelaget tipsar om at det er mogleg å låne rulleskøyter og hjelm frå bua på Husnes, for dei som ikkje har slikt liggjande.

Styret i Rosendal Bygdelag, består av Anne Sigrid Totland, Stine B. Hatteberg, Merete Skeie, Siv Lorentzen og Arnout IJzermans. Dei har no sitt hovudfokus på born og ungdom, og dersom Roller discoet slår an, ser dei ikkje bort i frå at det kan bli fleire slike frametter.

Bygdelaget har tankar om fleire framtidige prosjekt, og oppmodar dessutan den lokale ungdomen til å ta kontakt dersom det er noko dei saknar i bygda.