Mutasjonssmitte på verft i Haugesund – fleire hundre må testast
Fleire hundre personar må koronatestast etter at ein person på Aibel sitt verft i Haugesund har blitt smitta av den britiske virusmutasjonen.
Det er Haugesunds Avis som melder om den påviste virusmutasjonen på verftet i Haugesund fredag.
Artikkelen held fram under annonsen.
– Vi har ein smitta som vart oppdaga måndag, og i går fekk vi vita at det var den engelske varianten. Han er sett i isolasjon. Nærkontaktar er identifisert og i karantene, men ingen av dei har fått påvist smitte, seier kommunikasjonsdirektør Mona Winge til NTB.
Selskapet har tett dialog med Haugesund kommune, som har vedteke å gjennomføra ei massetesting.
– Fleire hundre skal testast, så det er ein god del. Vi går breitt ut. Det er ikkje vanleg, men vi gjer det i dette tilfellet, seier kommuneoverlege Jostein Helgeland til Haugesunds Avis.
Det er ved verftet til Aibel i Haugesund at «Njord Bravo» vert oppgradert. Eit prosjekt kor fleire kvinnheringar er involvert.