Når det står om minutta
Ved hjerneslag tel kvart minutt. Rask behandling kan vere avgjerande for utfallet. I nasjonalt pakkeforløp for hjerneslag er målet at 50 prosent av pasientane med symptom på akutt hjerneslag skal ha fått varsla AMK (113) innan 15 minutt. Ofte er det personar som oppheld seg saman med den som får symptom, som må ringe 113.
Norsk hjerneslagregister publiserte nyss tal som syner kor raskt 113 vert varsla ved symptom på hjerneslag. Tala som er for 2025 og så langt i 2026 syner store forskjellar mellom sjukehus og område. Og dei fleste ligg langt under det nasjonale målet.
Under måla
Annonse
Tala syner mellom anna at resultata på landsbasis berre er på 30 prosent. Ingen helseregion når målet på 50 prosent, og for vår eigen region, Helse Vest, ligg tala på 31 prosent.
Tala syner og at på sjukehusnivå ligg nesten alle sjukehus i landet under 50 prosent, og for Stord sjukehus er talet 43 prosent. Det er så langt ikkje publisert tal for Haugesund sjukehus i 2026, men ser ein berre på tala for 2025 var talet då på 30 prosent.
Betre informasjon
Landsforeininga for hjarte, lunge og hjerneslag (LHL) har gjennomført ei undersøking om befolkninga sin kunnskap om symptom på hjerneslag. Slik kunnskap er avgjerande for at 113 (AMK) vert raskt varsla. Resultata underbyggjer behovet for betre informasjon til befolkninga.
Annonse
Dersom ein mistenkjer hjerneslag er handlingsregelen enkel: be personen prate, smile og løfte hendene. Dersom personen plutseleg får problem med éin av oppgåvene, skal ein ringe 113 umiddelbart.
Berre 31 prosent vel alle dei tre teikna i hjerneslagsregelen -prate, smile, løfte. Ein finn og store forskjellar mellom kvinner og menn. Medan 42 prosent av kvinnene velgjer alle dei tre teikna, er andelen berre 22 prosent blant menn. No krev LHL ein ny nasjonal symptomkampanje.
Varskutal
– Dette er varskutal. Vi har fått stadig betre behandling av hjerneslag, men behandlinga må starte raskt. Behandlingskjeda startar difor med at nokon ser symptoma, forstår alvoret og ringer 113. Vi ynskjer difor ein ny nasjonal symptomkampanje, seier Magne Wang Fredriksen, generalsekretær i LHL, i ei pressemelding.
– Målet er ikkje at alle skal kunne stille en diagnose, men å skape ein refleks: Plutselege vanskar med å prate, smile eller løfte – ring 113. Ein skal ikkje vente for å sjå om symptoma går over, seier Fredriksen.
Evalueringa av den tidligare nasjonale kampanjen synte at kjennskapen til slagsymptoma auka og at fleire varsla 113. Effekten var særleg stor blant menn og yngre. Dei same gruppene som kjem svakast ut i LHL si nye undersøkjing.
