Nattestengt bru denne helga
Fureberg bru vil vera stengt for trafikk natt til laurdag og søndag.
I desse dagar jobbar entreprenørane med å få på plass forskaling av overbygninga på den nye brua ved Furebergfossen. Det siste spennet står att, og då må dei også ha på plass eit fagverk som forskalinga skal ligga på. For å få det arbeidet gjort treng dei ein større mobilkran, som vil ta ein god del plass på dagens veg.
Artikkelen held fram under annonsen.
– Då vert det heilt naudsynt at vi stenger vegen to netter og delvis kveld, seier byggeleiar Bjørn Giljarhus i ei pressemelding.
Vegen vil bli stengt mellom klokka 00.30 og 07.30 laurdag og frå klokka 21.30 laurdag kveld til klokka 07.30 søndag morgon.
– Alternativ omkøyring blir om Matre og via Åkrafjorden eller nordsida av Hardangerfjorden og tilbake via Jondal, står det å lesa i pressemeldinga.
I arbeidet så langt er landkaret til brua og søylene som brua står på i elveløpet støypt ferdig.
– Støyping av sjølve brudekket vil skje i desember. Den nye brua blir bygd 10 meter lengre ut frå fossen, og det er to gode grunnar til det, heiter det i pressemeldinga:
– Dette gjer vi for å unngå både fossespruten, og at det til tider blir kasta stein inn på brua når vassføringa er stor, seier Giljarhus.
Brua skal stå ferdig i juni 2020.