No kan du lasta ned Grenda som app

Endeleg kan vi tilby lesarane våre Grenda som applikasjon på mobil og nettbrett.

Torsdag i førre veke vart Grenda ny både digitalt og på papir. No kjem avisa også endeleg som app.

– Ein app er noko som har vore sterkt etterspurd hos mange av våre digitale brukarar ei god stund. Vi veit at bruk av appar har blitt ein del av den digitale vanen til folk, særskild på smarttelefonar og nettbrett. Difor er det gledeleg at det no også er mogleg å lasta ned Grenda frå butikkane til Apple og Android, seier redaktør Håvard Sætrevik i Grenda.

Digitale moglegheiter

Inne i appen er det mogleg for lesarane å tilpassa sine eigne ynsker om dei vil det. Det betyr at om du for eksempel er ekstra interessert i sport eller politikk, så kan du haka av for det, og få eit varsel kvar gong avisa skriv om dette emnet.

– Å få på plass appen er ei forlenging av endringa på bladbunaden og at vi fekk på plass ei ny nettside. Vi er glade for dei tekniske moglegheitene dette opnar for oss, og håpar at vi kan gjera nytte av dei på ein god måte for lesarane våre i tida framover, seier Sætrevik.

E-avis

Det er sjølvsagt også mogleg å lesa e-avisa i den nye applikasjonen.

– Tilbakemeldinga så langt er at e-avisa på appen fungerer betre enn om ein les den via nettlesaren på mobil eller nettbrett, seier Sætrevik.

For dei lesarane som har lyst på appen, men ikkje får til å installera den, er det berre til å ta kontakt med ein av avisa sine tilsette.

– Vi hjelper sjølvsagt til med det, seier dagleg leiar Jarle Håvik i Grenda.