No må også elbilistane betala bompengar
Elbil og andre nullutsleppsbilar skal betala halv pris av bompengane i alle bompengeprosjekt og bompengepakkar i Hordaland.
Det har utval for miljø og samferdsle gått samrøystes inn for, skriv Hordaland fylkeskommune i ei pressemelding.
Artikkelen held fram under annonsen.
Det er ti bompengeprosjekt med innkrevjing på land og tre på ferjer i Hordaland. Den kraftige auken i tal elbilar har redusert bompengeinntektene. Fylkesrådmannen meiner difor det er naturleg at også nullsleppskøyretøy skal vera med i spleiselaget og betala bompengar.
– Elbilar bidreg til køar og redusert framkome og ureina like mykje som fossilbilar med slitasje på vegbana og utslepp av mikroplast frå dekk, heiter det i pressemeldinga.
Halsnøy
Fritak for nullutsleppskøyretøy vart i si tid primært innført som eit verkemiddel for å stimulera til innføring av ny teknologi og for å redusera klimagassutsleppa.
– Det blir framleis stimulans til nullutsleppskøyretøy gjennom fritak for moms ved kjøp, redusert pris ved bompasseringar og framleis høve til å køyra i kollektivfelta dei fleste stadar, står det å lesa i pressemeldinga frå fylkeskommunen.
Vidare står det at det i allereie er vedteke, i avtale med Miljøløftet, at bompengane skal vera om lag halv pris av bensinbil med autopassavtale. No skal bompengar for elbil i tillegg til Bergen omfatta: Askøy, Hardangerbrua, Voss, Kvam, Halsnøy, Jondalstunnelen, Åkrafjorden, Bømlo og Haugalandet.
I tillegg vil fire ferjesamband få bompengar for elbil: Dei to i Austevoll, Langevåg – Buavåg og Åsnes – Gjermundshamn.
Artikkelen held fram under annonsen.
Fylkesutvalet skal ta endeleg stilling til bompengar for elbil torsdag 25. oktober.