«Nobody knows the trouble I’ve seen...»

Rådmann Odd Ivar Øvregård avslutta sitt siste kommunestyre i Kvinnherad med eit kulturelt innslag med tydelege undertekstar, då han song gospelsongen «Nobody Knows the Trouble I’ve Seen» i kommunestyresalen torsdag kveld.

Med si djupe og klangfulle bassrøyst sette han både punktum og ropeteikn etter å ha blitt takka av med mange rosande ord frå alle parti i kommunestyret.

Under møtet vart Torstein Aarthun innsett som ny, mellombels rådmann, og han heldt også ein tale til kommunestyret som var prega av alvor og ei audmjuk innstilling til den nye rolla han har sagt ja til.

– Eg er glad for at Torstein har sagt ja til å ta denne jobben. Eg veit at han vil dykk vel, og vil at de skal lukkast. Eg håpar de vil at han skal lukkast også, sa den avtroppande rådmannen til kommunestyrerepresentantane som eit siste råd på vegen.

Ordførar Peder Sjo Slettebø var raus med godord om jobben rådmannen har gjort for Kvinnherad, og varaordførar Hans Inge Myrvold vart svært rørt då han skulle seia nokre avsluttingsord til Øvregård. Rådmannen heldt også ein avskjedstale, der han sa at han framleis ikkje angra på at han hadde teke jobben i Kvinnherad, trass i avsluttinga det heile fekk.

– Det har blitt sagt at det har vore ljos på kontoret mitt tidleg og seint. Det er ikkje fordi nokon har tvinga meg, men fordi eg synest dette har vore ein svært interessant jobb, sa Øvregård, som forutan den meir enn subtile underteksten i songen ikkje kom med kritikk mot personar eller prosess i saka om seg sjølv.

Kva han synest om saka som har vore vil han spara til kontrollutvalet og Deloitte.

– I kveld har kommunestyret teke steget inn i topp divisjon, der Fedje er i bånn divisjon. Fantastisk! Det var veldig kjekt å vera her i dag, sa Per Ove Kviteberg frå talarstolen etter det som likna meir på eit vekkingsmøte i sørstatane enn eit kommunestyremøte i Kvinnherad.

Les meir om det siste kommunestyremøtet før ferien i papiravisa på tysdag.