– Nødvendig med eigedomsskatt og utsetjing av investeringar

Kommuneleiinga sin økonomiplan legg opp til gjeninnføring av eigedomsskatt og at fleire tunge investeringar vert utsett. Talet tilsette i kommunen skal reduserast.

Fredag la ein småforkjølt Leif Ove Mikkelsen fram sitt aller fyrste budsjettforslag som kommunedirektør i Kvinnherad.

– Dette er faktisk litt spesielt for meg. Eg er veldig stolt over å kunne leggja fram dette forslaget, sa halsnøybuen.

Mikkelsen meinte at overskrifta for budsjettet er at Kvinnherad kommune har eit framifrå utgangspunkt, uansett målsetjing.

– Dette meiner eg verkeleg; Kvinnherad står godt rusta for framtida, slo han fast.

Mange er sjølvsagt spente på om det vert strukturendringar. Kommunedirektøren legg ikkje fram forslag om dette, men ber i staden kommunestyret vurdera det. Derimot føreslår han å vidareføra gratis SFO.

Sleppa nedsal

Nokre endringsforslag er det likevel. For Mikkelsen påpeika at kommunen i 2024 budsjetterer med 240 millionar kroner i ekstraordinære inntekter, men sjølv med desse inntektene forventar ein eit likviditetsunderskot på 12 millionar kroner.

– Det er til ettertanke at vi likevel ikkje går i balanse. Dette er ein svært sårbar måte å planleggja på, sa han.

Eit grep som kommunedirektøren meiner er nødvendig, er å igjen innføra eigedomsskatt på bustader, fritidshus og næring frå 2025. Dette for å makta å gjennomføra planlagde investeringar, unngå store underskot og sleppa nedsal frå kraftfondet.

I tillegg føreslår kommunedirektøren å skyva på investeringar for 455 millionar kroner. Også dette meiner han er heilt nødvendig, mellom anna på grunn av auke i rentekostnaden.

– Likevel skal vi gjera investeringar som mange andre kommunar berre kan drøyma om, presiserte Leif Ove Mikkelsen.

Utset idrettshall

I 2024 planlegg kommunen å investera for 323 millionar kroner. Mesteparten, heile 276 millionar, er knytt til ny barneskule på Husnes og Heradstun i Rosendal. I planperioden vil ein også prioritera kollektivknutepunktet på Husnes, Kvinnheradpakken og grøn næringspark på Husnes. I tillegg vil ein auka ramma for helsehus på Husnes frå 50 millionar til 100 mill.

Tiltak som kommunedirektøren meiner bør utsetjast inkluderer følgjande:

* Fleire prosjekt vedteke i bustadsosial handlingsplan.

* Fleire prosjekt knytt til rehabilitering av skular.

* Idrettshall i Rosendal.

* Redusera investeringsmidlar til grunnkjøp og tilrettelegging.

* Investeringsmidlar til områdeplanar Rosendal og Sunde.

* Investeringsmidlar til sentrumstiltak på Husnes.

* Investeringsmidlar til brannstasjonsstruktur.

* Investeringsmidlar til veg på Varaldsøy.

Husnestunet

Ser ein endå lenger fram, er det verdt å merka seg at det til opprusting av Husnestunet er sett av 75 millionar kroner både i 2029 og 2030.

Det vert elles lagt opp til å redusera talet tilsette med til saman 20 stillingar i 2026 og 2027. Dette skal gje ein kostnadsreduksjon på om lag 18 millionar kroner. Ingen skal bli oppsagte i denne prosessen.

– No er det politikarane som skal overta stafettpinnen, sa Leif Ove Mikkelsen då han takka for seg og gav ordet til økonomisjef Niels Jakob Erlingsson. Økonomisjefen fortalde at alle sektorane i den kommunale organisasjonen får mindre pengar å rutta med til neste år, med unnatak av helse, omsorg og sosial.

Han opplyste vidare at ein ser for seg reduserte opningstider i bassenga i 2024. Han varslar òg ein stor auke i gebyr innan vatn og avløp.

– Vi føreslår desse tiltaka etter ein grundig prioriteringsprosess. Sjølv med innføring av eigedomsskatt i 2025, så får vi berre eit marginalt likviditetsoverskot. Dette på grunn av eit svært offensivt og ambisiøst investeringsbudsjett, informerte Erlingsson.

Prosess

Utanom Grenda, var også Knut Johannes Helvik (H) og Per Harald Havnen Löfgren Johansen (Ap) til stades under presentasjonen i rådhuset. Det var såleis naturleg å spørja kva dei meiner om eigedomsskatten.

– Det vil eg ikkje kommentera no, svarte Helvik.

– No må vi ta tala til kommunedirektøren til etterretning, og setja oss ned og gå gjennom budsjettforslaget på ein ordentleg måte før vi uttalar oss. Det skal vera ein prosess som vi må vera tru mot, utan at Knut Johannes og eg skal uttala oss for mykje no, utdjupa Johansen.

Budsjettet skal endeleg vedtakast i kommunestyret torsdag 14. desember.