Noregs vetle Grønland

Eit av landets største friluftslivmagasin, UTE-magasinet som kjem ut sju gonger i året, var i haust på vitjing i kommunen. Dei var nærmare bestemt på padletur over Insta Mosevatnet i Blådalen og bretur på Mosevassbreen. Det resulterte i ein seks siders reportasje om det attraktive turmålet.

Vatnet, som etter kvart har vorte særs kjent blant padle- og turentusiastar, byr på kring tre kilometer med padling før du når bretunga av Mosevassbreen, ein brearm som strekkjer seg ned frå topplatået av Folgefonna. Før du når tunga på breen, padlar du over grønt vatn, mellom asurblå isflak og blankpolerte fjellveggar. Det er også mogleg å gå i land på sandbankane før brefallet, der du kan ete nista i relativt trygg avstand frå breen.

I reportasjen til magasinet var det mange særs nøgde turdeltakerar. Dei har i følgje reportasjen tidligare padla på Grønland, og trekte soleis parallellar til den opplevinga etter turen.

– Det er som å padle i eit maleri, vert ein turdeltakar sitert på.

– Denne padleturen liknar ikkje på noko ein elles møter i kajakkvardagen, sa ein annan.

Magasinet har ein brei lesarskare frå heile landet, og at reportasjen er framifrå reklame for området er det liten tvil om.