NRK: Feil autovern kan ha bidratt til at 18-åring omkom
Ulukkesanalysegruppa i Statens vegvesen har no levert granskingsrapporten etter dødsulukka på Opsangervegen 27. desember i fjor.
Det er NRK som har fått innsyn i granskingsrapporten.
Artikkelen held fram under annonsen.
I rapporten kjem det fram at 18-åringen bak rattet fekk skrens på bilen i ein slak venstreving på Opsangervegen. Bakenden på bilen slo ut mot høgre og bilen trefte så autovernet i motsett køyrefelt.
Akkurat på denne staden var det ei opning i autovernet, noko som til slutt fekk fatale følgjer.
«Bilen dreier noe, og går sidelengs inn i autovern-avslutningen på andre side av åpningen», vert det skildra i rapporten NRK har fått innsyn i.
– I denne ulukka avviste ikkje rekkverket bilen, slik det skal, seier seniorrådgjevar Terje Vidar Hoel i Statens vegvesen til NRK.
Fire kritiske punkt
I rapporten som NRK har fått innsyn i blir fire punkt trekt fram som særleg kritiske for at ulukka som kosta ein 18 år gamal mann livet, og der ein jamnaldrande mann vart kritisk skadd.
- For høg fart forholda tatt i betrakning
- Is/slaps i vegbana
- Fleire opningar i autovernet på strekninga
- Autovernet hadde feil avslutning (ikkje godkjent etter dagens standardar)
Artikkelen held fram under annonsen.
«Dersom minst en av disse hendelsene ikke hadde inntruffet, kunne ulykkes- og skadeforløpet vært brutt», slår ulukkesanalysegruppa fast.
Hans Olav Hellesøe, leiar for ulukkesanalysegruppa i Statens vegvesen vest seier til NRK at denne typen rekkverk fører til ekstra skadar på køyretøy.
Artikkelen held fram under annonsen.
– Rekkverket på staden var ikkje i samsvar med dagens standard. Denne type avslutningar fører til ekstra skadar på køyretøy, seier Hellesøe.
Har skifta ut autovernet
Kvinnherad kommune står som vegeigar og har etter dødsulukka lukka opninga i autovernet på ulukkesstaden.
– Detter er eit eldre veganlegg som blei bygd i tråd med det dåverande regelverket. Me jobbar kontinuerleg med å lukka flest mogleg opningar som ikkje har eit føremål, seier einingsleiar for veg, Per Inge Naterstad, til NRK.
Terje Vidar Hoel i Statens vegvesen fortel vidare til NRK at autovern med slike opningar er vanleg over store delar av landet.
– Det er diverre også ein del slike løysingar på riks- og fylkesvegnettet. Det var godkjent løysingar då dei vart bygde, men ein har lært litt undervegs. Slike løysingar blir ikkje bygde i dag, seier Hoel.