NVE med motsegn mot nytt næringsområde

NVE har fremja motsegn til detaljreguleringsplan for det nye næringsområdet i Sandviklio.

Som Grenda har skrive tidlegare vart reguleringsplanen for Sandviklio Næringspark sendt ut på høyring. Føremålet med planarbeidet er å leggja til rette for næring, lager og kontor, i tillegg til å kunna ta i mot overskotsmassar for mellombels lagring, sortering og gjenbruk.

NVE (Noregs vassdrags- og energidirektorat) har no fremja ei motsegn.

«Grunnlaget for motsegna er at det ikkje er tilstrekkeleg sannsynleggjort korleis tiltak i planen kan oppnå tilstrekkeleg tryggleik mot skredfare, og kva konsekvensar sikringstiltak kan få for tilstøytande areal. Dersom Kvinnherad kommune syter for å utgreia dette, konsekvensane er akseptable, og tiltaka blir innarbeidd i planen, fell grunnlaget for motsegna bort», står det i eit brev frå NVE til Statsforvaltaren i Vestland, med kopi til kommunen.

Det vert vist til at Norconsult har utført ei flaumfarevurdering av Oksarelva, sist oppdatert i 2021.

«Utførte flaumvurderingar tilseier at vasstandsstiging som følgje av flaum ikkje vil renna ut av elva, eller røra ved det planlagde industriområdet. Samtidig er det venta svært stor fart på vatnet under flaum med tilhøyrande fare for erosjonsskadar som kan leia vatn ut av elveløpet. Flaumfaren kan difor ikkje utelukkast slik området framstår», skriv NVE.

Lite og bratt

Norconsult konkluderte i si vurdering at vidare at utbygging innanfor faresona kan gjennomførast, men at eventuelle bygningar må plasserast eller sikrast på ein slik måte at dei ikkje står i fare for å bli råka eller ta skade av flaum eller overvatn.

NVE slår fast at Oksarelva er eit lite, men bratt vassdrag (0-902 moh). Dei meiner at slike vassdrag generelt har stort skadepotensiale.

«Det er fare for at ein 200 års flaum med klimapåslag i elva fører til erosjon og at elva tek seg nytt løp. Ei slik hending i eit bratt vassdrag har potensiale til å truga liv og helse», skriv NVE.

Dei meiner vidare at elveløpet mogleg kan sikrast, slik at ein oppnår tilstrekkeleg tryggleik for tiltak i tryggleiksklasse S2.

«Det vil likevel føra til ei kanalisering og ytterlegare plastring av høgre elvebreidd som i liten grad kan sikra at elva får ei naturlig utforming med kantvegetasjon. I tillegg vil ei kanalisering av høgre breidd kunne pressa skredmassar over mot venstre breidd og auka skred og erosjonsfaren der. Slike konsekvensar er ikkje gjort greie for. NVE har motsegn til planen på dette punktet», heiter det i brevet.

Skredfare

NVE har også motsegn når det gjeld skredfaren.

«Det er ikkje gjort vurderingar av korleis området kan sikrast mot skredfare, det er ikkje sett av areal til det, og konsekvensar av slike sikringstiltak for tilstøytande areal er ikkje gjort greie for», står det.

NVE skriv til slutt at når det blir fremja motsegn til planen betyr det at kommunen ikkje kan eigengodkjenne den med rettsverknad før grunnlaget for motsegna har falle bort.

«NVE si erfaring er at det er nyttig med dialog mellom oss og kommunen når det blir arbeidd med å koma motsegner i møte. Vi oppmodar dykk difor om å ta kontakt. De same må de gjera dersom de har spørsmål til motsegna, eller til andre faglege råd i dette brevet», heiter det avslutningsvis.