Ny flaum ved Dimmelsvik Bil

I helga vart Dimmelsvik Bil endå ein gong råka av overfløyming. Men vonleg var det berre eit eingongstilfelle.

Seinast 30. juli skreiv Grenda at det store flaumproblemet ved Dimmelsvik Bil endeleg var løyst. Nye og større røyr under bakken skulle etter planen ta seg av alt vatnet. Men i helga såg det ikkje slik ut.

– Vi byrja å lura, og tykte det var grådig rart at det skulle skje igjen. Det var frykteleg frustrerande, seier Bernt Bjørsvik, dagleg leiar i Dimmelsvik Bil.

For frå fredag kveld til laurdag låg det igjen mykje vatn ved bensinpumpene og utanfor butikken. Imidlertid var det relativt lite vatn utanfor verkstadhallen, som jo er staden som har vore mest råka tidlegare. Dette fekk Bjørsvik til å undra, og ved hjelp av Mesta fekk han undersøkt nærare kva som var problemet.

 

Vatn i butikken

– Heldigvis var det ei forklaring. Det viste seg at nokre svære røter, greiner og bladverk, mogleg etter noko gravearbeid lenger oppe i dalen, hadde tetta røyra. Eg reknar difor med at det var eit eingongstilfelle, og at det vil gå betre neste gong det regnar, seier Bjørsvik.

Noko vatn greidde å trenga inn i butikken i helga, men heldigvis ikkje verre enn at ein industristøvsugar makta å fjerna det, utan at større skade hadde skjedd.