Ny milepåle: Utførte støyp nummer 100.000 sidan starten

Sidan produksjonen av aluminium starta opp 3. november 1965, har Hydro Husnes no gjennomført 100.000 såkalla støyp.

Etter måndagens besøk hjå ECG på Årsnes, reiste stortingsrepresentant og leiar av Finanskomiteen, Eigil Knutsen (Ap) vidare til Hydro Husnes i lag med den lokale partidelegasjonen. Der vart dei tekne i mot av fabrikksjef Jon Ola Ystgaard og hovudtillitsvald Tor Jørgen Sætrevik.

Einar Gerhardsen

Duoen tok gjestene med på ei grundig synfaring i hallane. Turen starta i A-hallen i Elektrolysen, ifølgje Ystgaard Nord-Europas lengste bygning med sine 1068 meter. Hallen kom i drift i 1965.

– Fasinerande å tenkja på at i 1965 var Einar Gerhardsen statsminister. Har omnane vore i kontinuerleg drift? undra Eigil Knutsen.

– Ja, kanskje med unnatak av ein tre timars tid, opplyste Jon Ola Ystgaard.

– Vi hadde ein straumstans. Då stod verda på hovudet, utdjupa Tor Jørgen Sætrevik.

I starten var årsproduksjonen til Sør-Norge Aluminium 50.000-60.000 tonn. No er talet over 200.000 tonn, og meir skal det bli.

– Akkurat no driv vi og oppgraderer 80 av omnane i A-hallen for å få dei til å yta betre, fortalde Ystgaard.

Turen heldt fram inn i B-hallen. Den vart som kjent stengt i 2009 som følgje av finanskrisa. Før hallen kom i drift igjen i november 2020, vart omnane monaleg oppgraderte.

– Vi ser hallen prestera betre enn vi forventa, sa Ystgaard.

Jubileum

Då gjengen kom til Støyperiet serverte fabrikksjefen ei aldri så lita historisk nyhende.

– Støyp nummer 100.000 vart gjort for halvanna veke sidan, smilte han.

Heilt nøyaktig var det klokka 13.32 torsdag 25. januar at jubileumsprosessen starta. Det var skift 3 som fekk æra av å byrja «charge» 100.000 i produksjonssystemet. Det skjedde frå støypesystem B og omn B2.

– Hadde de ei markering av hendinga? spurde Grenda.

– Vi laga ei nyhendesak til internavisa, og så åt dei kake på Støyperiet, smilte Ystgaard.

Ifølgje internavisa var det Odin Ripel Harsvik som programmerte og starta den fyrste sekssifra chargen.

Sidan journalisten og sikkert ein god del av våre lesarar aldri har jobba på Søral/Hydro Husnes, bad han fabrikksjefen forklara kva eit støyp eigentleg er. Det viser seg at det no er fire omnar i Støyperiet, og kvar av dei kan ta i mot 50-60 tonn flytande metall frå elektrolysen. Når rett temperatur og konsistens er nådd, renn metallet ned på eit «bord», og deretter ned i mange støypeformer. Herifrå hentar ein ut ferdige aluminiumsboltar. Eitt støyp kan resultera i mellom 50 og 180 slike boltar.

– Vi klarar kanskje fire støyp på kvart skift. Så det tek nokre år å koma til 100.000, informerte Jon Ola Ystgaard.

Porsche

Synfaringa fortsette til Saga. Her vert produkta kvalitetssikra, saga, stempla og pakka, før dei blir sendte ut i verda. Eit av produkta er batterikassar til Porsche sine bilar.

– Viss du vinn i Lotto og kjøper deg Porsche, så kan det henda nokre av delane kjem herifrå, kommenterte Eigil Knutsen.

Ystgaard understreka at Porsche er veldig oppteken av å minska CO2-avtrykket sitt.

– Vi ser at lågkarbon-produkt har ein verdi, slo han fast.

Hydro Husnes lagar både aluminium og aluminiumsprodukt. 70% produksjonen går til europeisk bygningsindustri, resten til bilindustrien.

– Det som er så fantastisk med aluminium, er gjenbruken av det, vurderte Tor Jørgen Sætrevik.

– Aluminium er utan samanlikning det metallet som er best eigna for resirkulering, supplerte Jon Olav Ystgaard.