Ny runde med kvardagsliv: har du tips til oss?

Hugsar du Grenda sine populære fotoreportasjar om kvardagslivet i Kvinnherad i 2012, 2013 og 2017? På torsdag skal me ut i felten igjen, og vil gjerne ha tips om folk, foreiningar og bedrifter me kan møta.

Dette er noko Grenda har gjort ved ulike høve. Den 24. november 2012 var overskrifta på Grenda si framside «Portrett av ein kvardag». Inne i avisa var det 11 sider med bilete av ein heilt vanleg haust-kvardag i kommunen vår. Tilbakemeldingane etterlet ingen tvil om at dette var noko avisa sine lesarar likte svært godt. Éin knapp månad seinare gjentok me suksessen, då med hovudfokus på førjulstida. I januar 2013 følgde me opp med ein større artikkel om folk som arbeidar om natta, og i februar portretterte me dei siste fastbuande på Snilstveitøy. Serien vart avslutta med ein fotoreportasje frå kommunestyret i mars og oppslaget «Nytt liv» i april.

8. juni 2017 hadde me 21 sider med det me kalla «Kvardagsglimt frå Kvinnherad», som tok pulsen på ein fin dag seint på våren.

 

Kom med tips

No har me lyst å fortelja om kvardagslivet den 18. oktober 2018. Våre tilsette vil spreia seg utover heile kommunen, frå tidleg til seint.

Kanskje du er ute og luftar hunden eller handlar inn dagens middag? Kanskje du skal på fotballtrening eller syklubb? Kanskje du sit på kontoret eller rundt bordet i kantina? Ingen ting er for stort eller for lite til å koma med i reportasjen.

Sjølv om me skal patruljera frå nord til syd og frå vest til aust, vil vi gjerne ha tips om stader og folk vi kan møta. Einskildpersonar, lag, foreiningar og bedrifter må såleis svært gjerne senda oss ei melding, så skal me prøva å koma innom om det høver. Det dreiar seg i så fall om å ta eit bilete eller to, og å skriva ein kort bilettekst. Oppslaget kjem på prent torsdag 25. oktober.

Tips kan meldast inn på telefon 5348 7100, via e-post: post@grenda.no eller på som melding til Grenda på Facebook.