Ny runde med kvardagsliv

Hugsar du Grenda sine populære fotoreportasjar om kvardagslivet i Kvinnherad i 2012 og 2013? På torsdag skal vi ut i felten igjen, og vil gjerne ha tips om folk, foreiningar og bedrifter vi kan møta.

Den 24. november 2012 var overskrifta på Grenda si framside «Portrett av ein kvardag». Inne i avisa var det 11 sider med bilete av ein heilt vanleg haust-kvardag i kommunen vår. Tilbakemeldingane etterlet ingen tvil om at dette var noko avisa sine lesarar likte svært godt. Éin knapp månad seinare gjentok vi suksessen, då med hovudfokus på førjulstida. I januar 2013 følgde vi opp med ein større artikkel om folk som arbeidar om natta, og i februar portretterte vi dei siste fastbuande på Snilstveitøy. Serien vart avslutta med ein fotoreportasje frå kommunestyret i mars og oppslaget «Nytt liv» i april.

 

Kom med tips

No har vi lyst å fortelja om kvardagslivet den 1. juni 2017. Våre tilsette vil spreia seg utover heile kommunen, frå tidleg til seint. Kanskje du er ute og luftar hunden eller handlar inn dagens middag? Kanskje du skal på fotballtrening eller syklubb? Kanskje du sit på kontoret eller rundt bordet i kantina? Ingen ting er for stort eller for lite til å koma med i reportasjen.

Sjølv om vi skal patruljera frå nord til syd og frå vest til aust, vil vi gjerne ha tips om stader og folk vi kan møta. Einskildpersonar, lag, foreiningar og bedrifter må såleis svært gjerne senda oss ei melding, så skal vi prøva å koma innom om det høver. Det dreiar seg i så fall om å ta eit bilete eller to, og å skriva ein kort bilettekst. Oppslaget kjem på prent torsdag 8. juni.

Tips kan meldast inn på telefon 5348 7100 eller e-post: post@grenda.no.