Nye fotokunstnarar til Halsnøy kloster.

Frå torsdag av har Halsnøy Kloster igjen besøk av internasjonale fotokunstnarar. Tre dyktige fotografar skal arbeide med eigne prosjekt i tre veker, og som vanleg vert det utstilling av arbeida deira neste år.

Måndag 13. mai kjem fotografane til å presentera seg sjølve og noko av det dei arbeider med.

– Då er alle interesserte velkomne til klosteret. Vi ser fram til å ha dei på besøk, skriv avdelingsleiar Helén Petersen i ei pressemelding.

Samir Tlatli er frå Tunis, men har sidan 2012 budd og arbeidd i Paris. Han arbeider mykje med utgangspunkt i sin eigen situasjon som innvandrar i Frankrike, og brukar ofte seg sjølv i bilda sine. Uvisse, å ikkje høyre til, er mellom dei tema han er oppteken av.

Daniela Friebel kjem frå Tyskland og Berlin. Ho arbeider både med fotografi og installasjonar, og går ofte djupt i materien innan for det konseptet ho tek føre seg. Eksempelvis installasjonen «240 objekt og nylon tråd» der ho har hengt opp 240 gjenstandar som folk ikkje har hatt bruk for lenger.

Anne-Sophie Costenoble er frå Belgia, og arbeider mellom anna med vakre, sarte svart/kvitt bilete. Ho er utdanna i kunsthistorie, og har stilt ut over store deler av Europa.