Nystarta Husnes-firma har over ein halv milliard i ordreserve

Fire gründerar har saman med Consto Anlegg AS etablert firmaet Consto Dambygg AS. To av gründerane er frå Kvinnherad.

Etter at YIT Infra Norge, som hadde regionkontor i Teigen, bestemte seg for å avvikla drifta i Norge i oktober i fjor, såg fire gründerar med erfaring frå selskapet sitt snitt til å vidareføra kompetansen under ein ny paraply. I slutten av oktober gjekk dei saman og etablerte bedrifta som fekk namnet Consto Dambygg AS etter at dei fekk Consto Anlegg AS inn som majoritetseigarar ved årsskiftet.

– Vi følte at vi hadde god kontroll på den delen av verksemda som vi var involvert i, og vi følte at den delen gjekk bra. Difor trudde vi at det skulle vera mogleg å gjera butikk av det, seier dagleg leiar Jarle Berg-Oksfjellelv.

Nøgd med valet

Då Berg-Oksfjellelv, som er tidlegare prosjektdirektør i YIT Infra Norge, saman med Trond Helge Heimvik frå Sandvoll, Nils Olav Teigen frå Husnes og Håvard Ådland bestemte seg for å satsa vidare, var det mange friarar som ville bli med.

– Vi gjorde då ein større jobb kring samarbeid før vi landa på Consto. Det var eit veldig bevisst val for oss, både i forhold til korleis dei som konsern opererer og fungerer. Og ikkje minst med tanke på den kompetansen dei har på anleggssida frå før og på satsingsområda deira. Vi passa veldig godt inn i deira verd, seier Berg-Oksfjellelv og legg til:

– Og så langt er vi veldig tilfreds med det valet. Consto Anlegg har innfridd i stor stil og vore ein veldig positiv eigar så langt.

Ein halv milliard

Consto Dambygg har tilsette frå fleire stadar i verda, men med hovudkontor på Husnes er dei også lokalt forankra til Kvinnherad. Brorparten av dei 58 tilsette er spreidd rundt om i heile landet, og som firmanamnet seier er hovudgeskjeften deira å etablera og rehabilitera dambygg.

– Vi jobbar primært med damkonstruksjonar, men også alt innanfor vasskraft forøvrig. I tillegg har vi ei fundamenteringsavdeling som driv med grunnstabilisering, seier Berg-Oksfjellelv.

I tillegg til dei to lokale gründerane frå Kvinnherad, har bedrifta i dag sju tilsette på lønningslista med adresse i Kvinnherad. Til liks med resten av sine kollegaer har dei travle dagar, etter det som må kategoriserast som ein svært vellukka start for firmaet som er lokalisert i Teigen.

– Det har gått strålande så langt. Vi har fått fleire kontraktar, og har i per dags dato ein ordreserve på kontraktar som er inngått på over ein halv milliard kroner, seier den daglege leiaren.