Nytt apotek til Husnes

Geir Jakobsen og Husnes Storsenter signerte torsdag kveld ein avtale med apotekkjeda Apotek 1, som blir det nye tilskotet i butikkfloraen til senteret.

– Vi har fleire alternativ til lokale, og vil no finna det som passar best. Så vil Apotek 1 umiddelbart starta prosessen med å etablera seg i eitt av våre ledige lokale. Noko vi er veldig glade for, seier senterleiar Geir Jakobsen.

Apotek 1 har over fleire år hatt eit ønskje om å etablera seg på Husnes, og har vore i kontakt med senterleiinga ved fleire høve. Og sjølv om det allereie er eit apotek i senteret, trur Jakobsen er det er rom for eitt til.

– Det er klart, vi har allereie eit stort og flott apotek frå før. Og mange meiner nok at det er meir enn nok, men i dag er eit apotek også ein butikk og har eit stort vareutval. Vi ser difor at det er fornuftig med to kjeder på ein så stor plass som Husnes. Dette blir både bra og sunt for alle partar, seier senterleiaren.

I tillegg til at det no blir to apotek å velja i, medfører også denne avtalen fleire arbeidsplassar i kommunen. Jakobsen trur Apotek 1 vil lysa ut stillingar om ikkje så veldig lenge.

– Vi er glade for ein kvar som vil etablera nye arbeidsplassar på Husnes. Særskild positivt er det at dei som skal driva kjem utanbygds frå, og skal etablera seg saman med familie med bustad i Rosendal. Så det blir både fleire arbeidsplassar og nye innbyggjarar til kommunen, og det er alltid kjekt, seier Jakobsen.