Nytt kjøken i Husneshallen

Arbeidet med det nye kjøkenet i Husneshallen er endeleg i gang, og det skal etter planen stå klart til bruk måndag 9. november.

Kiosken i Husneshallen har lenge hatt behov for ei utviding. No vil kjøkenet, som blir om lag tolv kvadratmeter stort, gi kioskarbeidarane betre arbeidsvilkår under dei mange arrangementa i hallen.

– Kjøkenet i Husneshallen har vore lite funksjonelt, det nye kjøkenet vil difor vera til glede for alle som nyttar hallen, står det i Handballmagasinet til KHK.

Det er midlar frå Sparebank 1-stiftinga Kvinnherad og støtte frå kommunen som gjer at arbeidet med å utbetre kjøkenet er mogleg. Sparebank 1-stiftinga gav i 2014 Kvinnherad handballklubb 100.000 kroner til arbeidet.

 

Leveringstida

Mykje av arbeidet er gjort og nybygget er ferdig gipsa. Når røyrleggjar- og elektrikararbeidet er ferdig, kan det nye kjøkenet monterast.

– Leveringstida på kjøkenet er det som tar tid, og det skal etter lovnadane koma 3. november. Då vil alt det andre arbeidet vera ferdigstilt, og kjøkenet vil stå klart måndag 9. november, seier byggjeleiar i Kvinnherad kommune, Arne Myklebust.

 

Betre tilhøve

Bruksområdet blir som tidlegare. Det er ikkje eit kjøken det skal lagast mengder med mat på, men ein stad der ein skal kunna driva kioskarbeid på ein god måte.

– Det blir i hovudsak som før, berre med meir arbeidsrom og betre tilhøve enn tidlegare. Med ny komfyr, nytt kjøleskap og ny oppvaskmaskin skal det bli eit moderne og flott kjøken, godt eigna til kioskarbeid, seier Myklebust.