Offentleggjer namnet – ber turgåarar sjekka bøker
I samråd med den amerikanske ambassaden og pårørande går politiet no ut med namnet på den sakna amerikanaren. Marvin Lee Judy Jr. vart sist sett i Rosendal 26. august.
– Sjå etter namnet Marvin Lee Judy Jr. i bøker på fjelltoppar. Har han vore på tur, er det mest truleg han var det den 26. august, men sjekk også på datoane 25. og 27. august, oppmodar lensmann Jan L. Fosse.
I eit forsøk på å avgrensa kvar ein skal leita, ber politiet no alle som går til fjelltoppane i Rosendalsfjella om å sjekka bøkene der, bla seg tilbake til datoane 25., 26. og 27. august og sjå om dei finn namnet til amerikanaren. Finn du namnet, oppmodar politiet deg til å ta bilete av boka og ta kontakt med politiet snarast råd på enten 02800 eller 53483800. Han kan også ha nytta Mark som førenamn i staden for Marvin.
Artikkelen held fram under annonsen.
– Det vil vera til enorm hjelp om publikum kan hjelpa oss å sjekka. Me jobbar no i lag med operasjonsentralen med å finna ut kor mykje mannskap me kan bruka til å leita, og på kva måte me skal organisera søk, seier Fosse.
Han legg til at det er grunn til å tru at Judy på tur i Rosendal brukte same jakke som på biletet.