Også Lemicka og Berge var på Stortinget

Sidan sist har det tikka inn endå to namn til oversikten vår over stortingsrepresentantar frå Kvinnherad. Lista inneheld dermed 24 namn totalt.

Det viser seg at Ove Lemicka var vararepresentant for Arbeidarpartiet i to periodar frå 1989 til 1997. I den tida noterte han seg for 11 dagar på Stortinget. Mannen frå Sunde har seinare meldt overgang til Framstegspartiet.

Mindre kjent for kvinnheringane er nok Gerd Eli Berge. Ho vart født i 1954, og vaks opp i Matre. Etter studiar i Oslo, arbeidde ho som veterinær i Valdres frå 1980 til 1992. I 1990 flytta ho til Nesbyen i Hallingdal, der ho har sidan har budd og vore aktiv i Senterpartiet på ulike område.

I perioden 2013-2017 var ho fyrste vara for Sp i Buskerud til Stortinget. Ho noterte seg for 38 dagar på tinget som erstatning for Per Olaf Lundteigen.

– Per Olaf Lundteigen sat i to komitear, dermed var eg òg med i to komitear; Arbeids- og sosialkomiteen og Kontroll- og konstitusjonskomiteen, opplyser ho.