Økonomisk utfordrande år for Hydro Husnes
Hydro Husnes hadde eit samla underskot på 107 millionar kroner i 2020.
Hydro Husnes presenterte fredag eit underskot i fjerde kvartal før renter og skatt på 34 millionar kroner, og eit samla underskot på 107 millionar kroner for heile 2020.
Artikkelen held fram under annonsen.
Usikker marknad
Fabrikksjef Johan Berg summerer opp det økonomiske resultatet for året med ein usikker marknad som følgje av Covid-19-pandemien, og eit betydeleg tap på tilbakesal av overskotskraft som følgje av at oppstarten av B-hallen vart utsett.
– Som for mange andre, vart også det økonomiske resultatet for Hydro Husnes prega av Covid-19. Marknaden var krevjande i andre kvartal og store deler av tredje kvartal. Samtidig er det positivt at vi no har starta B-hallen som vil betre vår konkurranseposisjon framover, seier Berg i ei pressemelding.
Sjølv om det er raude tal i resultatbøkene, er fabrikksjefen svært nøgd med måten dei tilsette ved Hydro Husnes har handtert det utfordrande året.
– Vi har hatt strenge smittevernreglar sidan mars, og vi har løyst oppgåver på nye måtar. Likevel opplever eg motiverte og positive medarbeidarar som set sikkerheita først, seier Berg.
Full kapasitet før sommarferien
Hydro Husnes leverer aluminiumspressbolt til bil- og byggebransjen i Europa, og har i tillegg no også starta leveransen av det nye spesialproduktet HyForge. Eit produkt som er spesielt retta mot bilindustrien.
«HyForge er ein Hydro-utvikla støypeteknologi som gir moglegheita for å gå over frå tradisjonell ekstrudert smibolt til støypt smibolt, noko som fjernar kostbare ledd i produksjonsprosessen, samtidig som den aukar kvaliteten», skriv Hydro i pressemeldinga.
Artikkelen held fram under annonsen.
– Marknaden har teke seg opp siste halvdel av 2020 og etterspurnaden er god i starten av 2021. Vi er også nøgde med at vår første leveranse av HyForge gjekk bra, og ser fram til å bli ein viktig leverandør av spesialprodukt til ein veksande marknad innanfor bilindustrien, seier Berg.
Han fortel også at oppstarten av B-hallen går bra.
– Oppstarten går bra og som venta. Per medio februar er 80 av 200 celler tilbake i drift og vi planlegg å ha hallen i full kapasitet før sommarferien. Det vert lagt ned ein imponerande innsats av heile organisasjonen med å få Hydro Husnes opp på full kapasitet, sluttar Berg.