Omfattande kutt i vente på Seim

Dårlege resultat over tid gjer at hovudkvarteret til Palfinger Marine Safety på Seimsfoss blir råka av nedbemanning.

– Kor stor grad det blir, er ikkje definert enno, men det vil få konsekvensar for tilsette på Seimsfoss-kontoret, seier seier dagleg leiar ved Palfinger Marine Safety Reinhard Lund-Mikkelson til Grenda.

Onsdag vart det halde allmøte for dei tilsette ved kontoret på Seimsfoss

– Med på møtet var eigarane frå Austerrike, samt dei som har ansvaret for vår bransje, stadfestar Lund-Mikkelson.

Dårlege tal

Bakgrunnen for møtet var dei dårlege resultat for Palfinger Marine Safety dei siste åra, underskot på 61 millionar i 2016 og 110 millionar i 2017.

– Tala for 2018 vil eg ikkje kommentera, då dei ikkje er godkjente enno, seier den daglege leiaren.

Han vil heller ikkje seia noko om kor mange tilsette som må gå.

– Det blei formidla omstrukturering og reorganisering frå leiinga frå Austerrike. Det får i utgangspunktet konsekvensar for avdelinga på Seimsfoss. I Ølve har fabrikken forpliktingar langt fram i tid, og der treng me tilsette me har. Seimsfoss har sju fabrikkar som soknar til oss, og marknaden på verdsbasis påverkar oss. I kor stor grad dette vil påverka oss, er ikkje definert enno. Ein skal starta ein prosess for å sjå på det, kommenterer Lund-Mikkelson.

Han legg til at det allereie er gjort tiltak på Seimsfoss, men at eigarane vil gjera meir, og må gjera meir. Det skal gjerast på ein skikkeleg måte, og Palfinger skal ha ein god prosess.

– Dette har med marknaden og den nye eigarskapen å gjera, sluttar Lund-Mikkelson.