Omkøyringsveg utanom Rosendal

I Kvinnherad har dei naturhistoriske kreftene sprudla i kreativ skaparlyst gjennom kvartærtida. Dei meisla ut fjella, fjordane og elvedalane, og la lausmassar att som meir eller mindre slett land langs strendene. Eldre bygningar og kulturgrep vart gjorde med respekt og vørdnad for rammene dei hadde. Eg er ikkje like sikker når det gjeld nyare byggeaktivitet.

 

Nærmar seg tolegrensa

Trafikken gjennom Rosendal er eit tema som støtt vender attende. I dag nærmar den seg tolegrensa i turistsesongen. For 40 år sidan nemnde underteikna eit alternativ for omkøyring i røyr med to-vegs trafikk på grunt eller djupare vatn gjennom Malmanger- og Skålavikjo.

Framlegget vart sjølvsagt gjort latterleg i forsamlinga. Viktigaste motargumentet var at bygda miste mogleg handel (spontankjøp). Det var gangbart argument då. Vi hadde dessutan framleis ein reguleringsplan som viste ein stutt omkøyringsveg gjennom Årmannshaug.

I dag er ei slik omkøyring gjort umogeleg, eller vil kosta uhorveleg (grunnavståing, rasering av dyrka mark, tun, hus, hagar, ny elvekryssing, og færre mogelege løysingar for framtidig bruk av areala i store deler av bygda). Når eg tek oppatt det gamle framlegget i 2020, vil det framleis bli møtt med hovudristing hos mange. Det lyt eg tola.

I det grunne alternativ 1 ( +/- 20 meter under vassyta) kan røyra stykkevis kvila på fjordbotn. Med dei ilandføringar som er vist der, vil storparten av tettstaden Rosendal verta kvitt plagsam trafikk i overskodeleg framtid. Stigninga vert heller ikkje større enn slik ho er i dag frå Skåla til høgste Nes. Lengda for dette alternativet vert i underkant av 3 km.

 

For og mot

Argument som talar for:

Nr. 1. Omkøyringa vert eit godt alternativ for tungtrafikk, utrykkingskøyretøy som politi, sjukebilar, brannbilar og andre som ikkje ønskjer å køyra gjennom Rosendal sentrum.

Nr. 2. Dei slepp dumpane og kan halda større fart. Stundom står det om liv.

Nr. 3. Betre miljø, mindre støy og forureining for dei som driv handel og service i Skålagato.

Nr. 4. Stor vinning for Rosendal som turistbygd.

Nr. 5. Langsiktig løysing. Det som er føreslege til no er helst akuttløysingar.

Argument mot:

Prisen er ukjend, men truleg høg.