Open dag på brannstasjonen på Husnes

Måndag startar årets brannvernveke, som kulminerer i open brannstasjon på Husnes neste laurdag.

350 brannstasjonar over heile landet opnar portane for små og store laurdag 24. september. I vårt distrikt kan du besøke Husnes brannstasjon. Nye tal viser at hausttradisjonen «open dag» framleis er viktig for å redusera omfanget av alvorlege bustadbrannar, skriv Øyvind Ousdal i Kvinnherad brannvern i ei  pressemelding.

Artikkelen held fram under annonsen.
• 9 av 10 har ikkje avtalt møtestad i tilfelle brann.
• 1 av 3 kan ikkje naudnummeret til brannvesenet.
• 1 av 4 er usikre på om sløkkjeapparatet fungerer.

Desse tala kjem fram i ei ny undersøking TNS Gallup har utført for If Skadeforsikring, Direktoratet for samfunnstryggleik og beredskap (DSB) og Norsk brannvernforening i høve årets brannvernveke.

 

Øving må til

– Byrjar det å brenne, er du og familien veldig overlatne til dykk sjølve i dei første livsviktige sekunda og minutta. Då er det ikkje tid til å gruble over kvar det er trygt å rømme, google etter kven de skal ringe til, eller pakke ut brannsløkkjeapparatet av emballasjen. Det er berre gjennom å ha brannøving heime de kan trene på dette, seier konserndirektør Morten Thorsrud i If, ein av medarrangørane til open dag på brannstasjonane.

I vårt distrikt er det Kvinnherad brannvern, Det lokale eltilsyn ved Kvinnherad Energi, Røde kors og Petol som står for gjennomføringa av arrangementet.

– «Open dag» har blitt ein fin tradisjon i september kvart år. I fjor var det rundt 250.000 besøkande på landsbasis. Arrangementet samlar vaksne og barn til morosam læring med ein alvorleg undertone, idet me går inn i ei årstid der talet på bustadbrannar vanlegvis aukar i takt med at vi trekkjer innandørs, skrur på varme, fyrer i omnen og tenner lys, seier Øyvind Ousdal i Kvinnherad brannvern.

Det er også verdt å ta turen til Husnes stasjon for å sjå på den nye brannbil som ein har fått frå Gjensidige stiftelsen via Det store brannløfte, lokkar Ousdal.